#Шәхси фикер 10 марта 2022, 09:53 Уку өчен 3 минут

"Эй, малай, алып кил өчпочмак...": җырмы бу, әллә...?

10 марта 2022, 09:53

Уку өчен 3 минут

Корткычлар бакчага зыян салган кебек, күп кенә җырлаучылар (җыр шыгырдатучылар дисәк дөресрәк булыр!) татар җырына, моңына, теленә һәм хәтта милләтенә зыян китерә. Көлке тоелган җырлар зәвыгы, холкы ныгымаган үсмерләргә зур йогынты ясавын аңлап та бетермибез бугай. Шул җырлар аша тормышка карашлары да берникадәр формалаша.

Скопировать ссылку

"Эй, малай, алып кил өчпочмак...": җырмы бу, әллә...?

Шундый зур зыян салучыларның берсе дип Лэйнаны саныйм. Әйе, исеме үк сәер һәм безнеңчә түгел. Хәзер мөгез чыгарып танылырга тырышу күренеше киң таралды шул. Моң белән җәлеп итә алмагач, нишләсеннәр соң инде? Ә популяр буласы килә! Татар исеменнән ваз кичкән җырчыларны татар эстрадасына якын китермәскә кирәк дип саныйм. Андыйлар башта татар исеменнән баш тартса, соңрак милләттән дә йөз чөерәчәк.

Лэйна шау-шу тудырган “Малай на белом барсе” җыры белән танылды. Ютуб каналында урнаштырылган клибын 3,4 миллион кеше караган. Бу бик аяныч хәл!
“Эй, малай, алып кил өчпочмак,
Без него мне просто никак.
Я сижу у озера Кабан,
Монда элек Хан булган”.

Телен җуя барган татарларга шушы җыр гына җитми иде! Әллә соң бу кыз милләтебез дошманнары тарафыннан махсус җибәрелгәнме? Аңа Хан сүзен телгә алу да язык сыман.

Шаккатуымның иң югары ноктасы түбәндәге юллар булды:
“Мунчада әти кычкыра: «Себерке!»
Обругал или просто потерял?”

“Тәрбияви” сүзне дә кыстырырга онытмаганнар бит, ә! Җыр (алай дип түгел, такмак дип атау да артык, әлбәттә!) болай тәмамлана:
“Вместо слов ай лав ю
Мин сине яратам говорю.
Мин җырлыйм Сабантуйда:
“Мой Татарстан – булдырабыз бергә!”

Бу тозлы кыярга шикәр комы сибеп ашаган кебегрәк булды. Хәер, анысы тәмлерәктер дә әле. Кечкенә чакта аш пешерәбез дип, кулга нәрсә эләксә, шуны савытка салып болгата идек: чирәм, төрле үлән, вак ташлар, су, балчык. Менә бу “җыр” да шуннан артык булмаган. Әмма без ул ашны ашамый идек, ә бу “җыр”ны әвәләп кенә калмаганнар, киң җәмәгатьчелеккә дә тәкъдим иткәннәр. Сезнең ничектер – белмим, тик минем тамакта чуерташлары утырып калды.
Лэйнаның тагын бер җырына тап булдым. Монысы гел татар сүзләреннән генә тора дип сөенүем беренче куплетны тыңлауга чәлпәрәмә килде.
“Җилкәмдә елыйсың бер син,
Теләкләремне беләсең.
Калмады башка беркем,
Син киләсең дә китәсең...
Мин кайдадыр аста калдым,
Син юкта авыр суладым.
Бер тапкыр янда булсаң,
Авырлыклар миңа очрамас.
Ааа, төштем, ардым. Оныттың мине.
Кушымта:
Онытма кичер мине,
Синнән башка ардым мин.
Сөйгән ярың чикми синнән.
Синең күзләр минем хәтердә,
Үткәндә карарсың да китәрсең,
Яратканны син бит беләсең.
Безнең тарих артта кала,
Ә йөрәк һаман сине ярата”.

Моның “шагыйре” дә Лэйна үзедер дигән тоемлау бар миндә. Татар эстрадасында антипремия булдыра калсалар, беренче урынны яулар дигән ышаныч та бар.

P.s.: Җавап хаты язабыз дисәгез, языгыз, җәмәгать. Сезнең фикер безнең өчен дә мөһим.

Фото: https://pixabay.com/ru

Кызыклы яңалыкларны күзәтеп бару өчен Вконтактега кушылыгыз.

Язмага реакция белдерегез

Реакция язылган инде

Комментарийлар

Без имени

0

0

Үләәәм, татар теленең,татар моңының бугазына басучылар.Илһам абыйлар,Әлфия апалар кабердә борчылып яталардыр.

Без имени

0

0

Эле шушы жырчы Татар жыры конкурсында катнашыр.

Без имени

0

0

Дания Ханум, Эфэрин! Татар теленен агониясен тыеп язгансын. Кубэделэр алар, кызганычка каршы. Эле , зинира, ризат, сузлэре бетсэ- хай-вай, лай-лай-лай, дип «жырлыйлар», агамы тагы да кызганыч хэл