Эх син, яшьлек...

Үз яшегездән дә яшьрәк күренәсегез киләме? Моның өчен кыйммәтле кремнар сыларга, матурлык салонына барып та йөрергә кирәкми. Даруханәдән киптерелгән суүсем - ламинария генә сатып аласы була.
Чынаякка 2-3 чәй кашыгы суүсем һәм 4-5 чәй кашыгы кайнар су салабыз. Катнашма барлыкка килгәнче болгатабыз да, өстен каплап, 10 минут тотабыз. Иң мөһиме - суны күп салмаска, югыйсә, биткә сөртергә җайсыз була - катнашма агып төшәчәк. Бер ничә тамчы лимон согы (майлы битләр өчен), яки берничә тамчы теләсә кайсы чистартылмаган май, йә булмаса А яисә Е витаминнарының майлы эремәсе (коры бит тиресе өчен) өстибез дә биткә сылыйбыз. 20-25 минуттан җылы су белән юып төшерәбез. Әлеге битлекне атнасына 3-4 тапкыр кулланган очракта, бит тиресе тартылып, «җанланып» китә. Ике-өч атнадан ук ике-өч яшькә яшәреп киткәнегезне сизми дә калырсыз.