Фитофтороздан ничек сакланырга?

Фитофторозга каршы көрәшне беренче билгеләре күренгәнче үк, якынча июль урталарында башларга кирәк, әлбәттә.

Әлегә помидорларында таплар күренмәгән кешеләр Консенто, Ревус, Абига-Пик, Ордан яки башка препаратлар сиптерә ала. Аны һәр 8-10 көн саен кабатлагыз. Шуны да истә тотыгыз: бу препаратларны сиптергәч, помидорны 21 көннән соң гына ашарга ярый. Помидор өлгерә башлаган булса, Фитоспорин-М, БисолбиСан, Гамаир кебек биопрепаратлар кулланыгыз. Алары булмаса, суган яки сарымсак төнәтмәсе сиптерегез.

100 гр сарымсакны ваклап, өстенә 10 литр су салып, бер тәүлек төнәтергә дә, сөзеп, 1 грамм марганцовка өстәп, помидорларга бөркергә кирәк. Марганцовка салмасагыз да ярый. Ә менә йод белән сөтне кушып сибүнең нәтиҗәсе юк, ди белгечләр.

Әгәр дә помидорлар бер-бер артлы карала башласа, сәламәт булганнарын алып (өлгереп җитмәгән булсалар да), бер минут кайнар суда тотып (50 градус), соңыннан киптереп, караңгы урынга куегыз, алар анда өлгереп бетә.