Казан паркларында 20 чыршы тамашачыларны көтә

– Паркларда бәйрәм программасы әзерләнде, ә 20 паркта чыршы мәйданчыгы булдырыла. Мәсәлән, “Әкият” курчак театры каршындагы территориягә 20 метрлы чыршы урнаштырыла. Биредә ярминкә һәм уен мәйданчыклары эшләячәк. Лядов бакчасына да чыршы куела, “Елмай” балалар паркына бәйрәм чыршысы урнаштырылды инде, – диде “Казанның парклар һәм скверлар дирекциясе” муниципаль бюджет учреждениесе директоры Айгөл Латыйпова.

Черек күл паркында декабрь ахырында бушлай шугалак ачыла, беррәттән БиЮ кичәсе дә оештырыла. Черек күлдә 23-24 декабрьләрдә “Котлау бүлмәсе” (“Будка поздравлений”) урам студиясе эшли. Теләгән һәр кеше казанлыларга һәм башкала кунакларына котлау чыгышын яздыра ала. Әлеге котлаулар 31 декабрьдә шугалактагы экраннан күрсәтеләчәк. 8 гыйнварда – Халыкара фигуралы шуу көнендә Черек күл шугалагында мода күрсәтелә. Гыйнвар урталарында Черек күлдә Олимпия чемпионнары катнашында Илья Авербухның Winten Fest уздырыла.

“Крылья Советов” паркында 1 гыйнварда “Ретро Яңа ел” концерты була. Дәрвишләр бистәсендәге Комсомол күлендә 7 гыйнварда моржлар су коена. Горький паркында шул ук 7 гыйнварда кичке якта “Атмосфера” вокаль ансамбле һәм Дмитрий Железнов капелласы чыгыш ясый. Лядов бакчасында 10 гыйнвар кичендә DJ Stonik катнашында уен-биюләр оештырыла.

– Горки-Әмәт урманында 11 гыйнварда “Кар һәм пәрәмәч” (“Снежки и пирожки”) фестивале үткәрелә. “Ак Чәчәкләр” бульварындагы остаханәдә рәсем ясау дәресләре була, “Салават Күпере” торак комплексындагы паркта декабрьдән  өлкәннәр өчен хор лабораториясе эшли башлады. Серов урамындагы бульварда физик мөмкинлекләре чикле кешеләр өчен махсус әзерләнелгән мәдәни чаралар тәкъдим ителә, – диде Айгөл Латыйпова.

Черек күл паркында, Татарстан Республикасының төзелеш тармагы оешуына 100 ел скверында, Җиңү паркында һәм “Калейдоскоп” паркында тимераяк прокатлары булдырыла. Горки-Әмәт урманында һәм Җиңү паркында чаңгы прокатлары эшләячәк.