Яраннарны күчерергә вакыт

Шәхсән үзем тармакланып үскән карт яранымны язын дачабызга алып килеп, яшь ботакларын кисеп алып, клумба ясап, чыбыкчаларын дымлы җылы йомшак туфракка төртеп чыккан идем.

Талымсыз гөлләрем бик тиз тамыр җибәрде, сентябрь азагына чаклы чәчәк аттылар. Көзге кырау­лар төшкәнче, берничә төбен гөл савытларына күчереп утыртып, фатирыбызга алып кайттым, калганнарын дусларыма бүләк иттем.

Яранны карап үстерүнең авырлыгы юк. Өй шартларында тугыз ай чәчәккә күмелеп утыра, кышын караңгы урында – идән астында, подвалда яки җылытылган балконда, фатирдагы караңгы бүлмәдә ял итә. Тамырлары корымасын өчен, айга бер мәртәбә аз гына сугару җитә.

Март башында гөлләрне яктыга чыгарып, яңа туфракка күчереп утыртабыз. Ботакларын кисеп, тамырландырырга сулы стаканнарга тыгып куярга була. Яранга җылытылган яңгыр яки кар суын атнага ике-өч мәртәбә сибү җитә.

Краннан агызып алган су савытын ачык тотып кислородка баетабыз. Туфрагын даими йомшартып торуга, ашлауга, чәчәген койган сабакчыгын өзеп торуга мохтаҗ ул. Һөнәрмәнд чәчәк үстерүчеләр аны комплекслы органик минераль ашламалар: «Роял Микс», «Плантон К», «Чистый лист для петуний, сурфиний, пеларгоний» белән тукландыра.

Гөл тамырлары тармаклы, ботаклары учарлы, үзе сәламәт, купшы таҗлары эре булсын, чәчәкләре озаграк торсын өчен, «Любимый напиток цветущих растений», «Здравень-турбо для комнатных растений» белән тукландыру отышлы.

Шәхсән үзем «Биогумус» белән «Агрикола для цветов»ка, суперфосфат төнәтмәсенә өстенлек бирәм. Гаилә бюджетын саклап тотучы хуҗабикәләр кул астындагы табигый ашламалар белән тукландыруга өстенлек бирә.

Гөлләр гөмбәчек чиренә бирешмәсен,тамырлары нык булсын өчен, 1 л суга 1 тамчы йод тамызып, икенче юлы 1 л суга 1 аш кашыгы көл салып, 3-4 көн төнәтеп сибүчеләрне беләм. Кодагыем суган кабыгын пыяла банканың яртысы тулганчы тутырып, өстенә су салып, җылы урында төнәтә. Шушы сихәтле төнәтмәнең 1 бал кашыгын 1 л су белән сыеклап, гөлләренә, яшелчә рассадасына сибә.

5-6 йомырка кабыгын учта уып, 1 л суда 1 атна төнәтеп сипсәк, яран шаулап чәчәк атачак. Бер банан кабыгын 1 л суда 5 көн төнәтеп сибү дә отышлы. Соңгы ике төнәтмәнең исе яман, шунлык­тан ачык грунтта гына кулланып була.

Хәмидә Гарипова,
Казан.