Шагыйрә Флёра Тарханова вафат булган

Бу хакта "Матбугат.ру" хәбәр итә.

Шагыйрәне соңгы юлга озату иртәгә 1 август көнне 10:00да Филармония бинасында узачак.

Флёра Тарханова Чистай районы Яуширмә авылы зиратына җирләнәчәк. Якыннары һәм туганнарының тирән кайгысын уртаклашабыз. Иннә лилләһи вә иннә иләйһи раҗигун.
 
Википедиядән. Флёра Габдрахман кызы Тарханова (25.05.1947) — шагыйрә һәм тәрҗемәче. Татарстанның журналистлар (1995) һәм язучылар (1998) берлекләре әгъзасы.
 
1947 елның 25 маенда Татарстан АССР Чистай районы Яуширмә авылында укытучылар гаиләсендә, 9 балалы ишле гаиләдә туган. Яуширмә сигезьеллык мәктәбен (1962), Арча педагогия укуханәсен (1966), Казан дәүләт университеты тарих-филология факультетының татар теле һәм әдәбияты бүлеген (1975) тәмамлаган. «Эш кәгазьләрендә һәм рәсми документларда русча терминнарның татарча эквивалентлары» темасына филология фәннәре кандидатлыгына диссертация яклый (2005).
 
1966-1970 елларда Чистай районы Чирүле Шонталысы мәктәбендә, аннары Кыргызстан ССРның Ош өлкәсе мәктәпләрендә математика һәм рус теле укытучысы.
1970-1975 Казан дәүләт университеты студенты.
1975-1976 Университетны тәмамлагач, аспирантурада укый, ләкин укып бетерми.
1976-1988 «Радиоприбор» заводында инженер-конструктор.
1990 елларда хезмәт юлы журналистика белән бәйле: «Шәһри Казан» газетасында — тәрҗемәче, «Татарстан хәбәрләре» газетасында тәрҗемәче һәм тәрҗемә бүлеге мөдире (1994).
1995 елдан Татарстан министрлар кабинеты аппаратында тәрҗемәче — баш референт, беркетмәләр бүлеге баш киңәшчесе. Татарстан фәннәр академиясе каршында төзелгән терминология комиссиясе әгъзасы.
 
1990 елларда көндәлек матбугатта һәм күмәк нәшрият басмаларында әдәби тәрҗемәләре, очерк-хикәяләре һәм шигырьләре басылып чыга. Мәхәббәт, яшьлеккә багышланган, милләт язмышы турында борчулы уйланулы лирик шигырьләр, балалар өчен шигырьләр һәм әкиятләр яза. Әсәрләрендә әдәп-әхлак, тәрбия мәсьәләләрен күтәрә. Шигырьләренә композиторлар көйләр яза.
 
1971 елда чыккан «Азәрбайҗан хикәяләре» китабына Н. Аббасзадә һәм М. Ибраһимов әсәрләре Ф. Тарханова тәрҗемәсендә урнаштырылган. Рәсми документлар, эш кәгазьләре, төрле кулланма-ярдәмлекләр белән беррәттән, рус, украин, азәрбайҗан язучылары хикәяләрен тәрҗемә итә. Кәфил Әмировның «Хокук саклау органнарында эш кәгазьләре» (Деловые бумаги в правоохранительных органах), Зөфәр Фәтхетдиновның «Өзелгән куллар кемне эләктерер» һәм «Унынчы корбан» исемле детектив повестьларын, Г. Сәйфуллина-Михееваның «Мөхәммәд пәйгамбәр тормышыннан хикәяләр» китабын (1997), Д. Әхмәрова-Сәинованың «Салих Сәйдәшев» китабын (2001), Гүзәл Яхинаның «Зөләйха күзләрен ача» романын (2015) тәрҗемә итә. 1997 елда басылып чыккан «Русча-татарча иҗтимагый-сәяси сүзлек»не төзүчеләрнең берсе. «Республика Татарстан. Увлекательное путешествие» китабын тәрҗемә итә (2013) .
 
Китаплары

1998 «Синең кайнар сулышың»
1998 «Уңган кыз»
2001 «Йөрәгемә ишерелгән серләр»
2002 «Серле дөнья»
2003 «Өч каурый»
2005 «Яшьлек эзем калган сукмаклар»
2007 «Алтын уклар»
2007 «Язмышлар язылганда»