11 кешедән торган гаилә йорт-җирсез калган

Җирле хакимият бу мәсьәләне хәл итү белән шөгыльләнә инде.

25 февральдә төнлә Яшел Үзән районы Васильево шәһәр тибындагы поселогында килеп чыккан янгынның нечкәлекләре билгеле булды.
- Беренчел мәгълүматлар буенча, килеп чыккан хәлнең сәбәбе төзек булмаган электр җиһазлары булган, - дип хәбәр иттеләр Татарстан Гадәттән тыш хәлләр министрлыгы матбугат хезмәтендә.
Әлеге янгын нәтиҗәсендә 11 кешелек гаилә түбәсез калган. Хәзер аларны шул ук поселокта яшәүче туганнары сыендырган. Аларга шунда ук Татарстан Гадәттән тыш хәлләр министрлыгы хезмәткәрләре килгән һәм өйгә янгын турында хәбәр итүче махсус җайланма урнаштырган.
Хәзер Васильевода йортлары янучыларга ярдәм йөзеннән акча, әйбер һәм продуктлар җыю оештырылган. Ә җирле хакимият якын арада күп балалы гаиләгә фатир бүлеп бирергә вәгъдә иткән.
- Бу мәсьәлә хәзер хәл ителә. Мондый куркыныч бәлада калдырмабыз! - диде бистә башлыгы урынбасары Евгения Пушилина.
Исегезгә төшерәбез, янгын төнлә, гаилә йоклаган вакытта башланган. Янгын сүндерүчеләр сигналына баштан өлкән кызлары уянган, ул әти-әнисен уяткан. Тегеләр шунда ук балаларны җыя һәм аларны тәрәзәдән урамга чыгара башлыйлар - ишек аша чыгу юлы төтен аркасында киселгән була. Шулай итеп, әти-әниләр барлык сигез балаларын да куркынычсыз урынга чыгара һәм хәтта аларны мунчага урнаштыра алган.
Өйдә бары тик бер бабай гына калган, үзе мөстәкыйль рәвештә хәрәкәт итә алмаган - ир-ат инсульт кичергән, һәм тәрәзәдән үзе чыга алмаган. Аны йорт хуҗабикәсе урамга чыгарырга тырышкан. Бабайны һәлакәт урынына килгән Татарстан Росгвардиясе хезмәткәрләре коткарырга ашыккан. Прапорщик Ренат Хәмитов һәм сержант Айрат Нәҗметдинов пенсионерны күтәреп чыгып, оныклары урнашкан мунчага күчергәннәр.
Янгын сүндерүчеләр утны сүндергәннәр. Янгынның гомуми мәйданы 56 тәшкил иткән.