16 ел элек югалган кызны психдиспансердан тапканнар

Яңа ел алдыннан Красноярскида 2003 елда югалган кызны тапканнар. Шул вакыт эчендә ул психоневрология диспансерында булган. Анда эшләүчеләр кызның туганнарын эзләп караган, әмма таба алмаган.

Телевидениегә дә мөрәҗәгать итеп караганнар. 2014 елда, вакыт узу белән бәйле рәвештә, эзләү эше туктатылган.

2019 ел башында табиблар Юлиягә документлар ясату өчен полициядән булышуларын сорыйлар. Соңгылары исә кызның фотоларын волонтерларга бирә. Шуннан соң туганнары Юлияне танып ала. Яңа елны алар аны үзләренә алып кайта.

Начар сөйләшә торган кыз Томскида күп балалы гаиләдә яшәгән. 16 яшендә кибеткә чыгып киткән җиреннән кире кайтмый. Полиция дә аны таба алмый. Томскидан Красноярскига ничек килүе дә билгесез. Кыз да табибларга үзенең кем булуын әйтеп бирә алмый.