Балалар бакчаларында бәйрәмнәргә әти-әниләр кертелерме?

Россиядә генә түгел, Татарстанда да коронавирус йоктыру очраклары көннән-көн арта. Бүген, 9 февраль көнне 1,5 меңнән артык кешедә коронавирус ачыкланган.

Тиздән тагын бәйрәмнәр җитә. Балалар бакчаларында сабыйлар 23 февраль һәм 8 март уңаеннан кичәләр оештыра. Ковид таралу сәбәпле, “утренник”ларга әти-әниләр кертелерме дигән сораулар килә башлады.

Бу хакта коронавируска каршы оператив штаб уздырган туры эфир вакытында медицина фәннәре кандидаты, Роспотребнадзорның Татарстан буенча Идарәсенең эпидемиологик күзәтчелек бүлеге җитәкчесе Лилия Юзлибаева җавап бирде.

“Балалар бакчаларында бәйрәмнәрне бер төркем эчендә генә үткәрү рөхсәт ителә. Әгәр дә анда өлкәннәр була икән, алар битлек кияргә һәм коронавируска каршы вакцина ясаткан булырга тиеш”, - дип аңлатты белгеч.