Казан автомобильләр сату күләме буенча беренче өчлектә бара

Транспорт комитеты рәисе Айдар Габделхаков Казан мэриясендә узган эшлекле дүшәмбе киңәшмәсендә шул хакта хәбәр итте, дип яза Татар-информ.

«Автостат» агентлыгы мәгълүматлары буенча, соңгы елда Казанда автомобильләр сату күләме 14 процентка арткан, бу 21,5 мең яңа машина дигән сүз. Шул рәвешле Казан, Мәскәү һәм Санкт-Петербургтан гына калышып, илдә өченче урынны алды», - диде Габделхаков.

Ул китергән мәгълүматлардан күренгәнчә, 1 сентябрьгә Казанда 414 меңнән артык автомобиль теркәлгән. «2014 ел белән чагыштырганда машиналар саны 6 процентка артты, бүгенге көндә 1000 кешегә 333 автомобиль туры килә», - дип өстәде Транспорт комитеты рәисе.

Моңа кадәр Казанның кайбер урамнарында парковка бәясе 100 сумга кадәр артачагы билгеле булган иде.