Казанда мәчет каршында җеназаханә ачылды

Башкаланың «Казан нуры» мәчете, шуларны истә тотып, мәрхүм булган мөселман кешене шәригатькә туры китереп юып, кәфенләп, җеназа укып озатуны үз эченә алган хезмәт булдырган. Җеназаханәне арендага алу - 2000 сум.

- Мәчет каршында эшләп килүче җеназаханә турында әлегә күпләр белми, - диде безгә «Казан нуры» мәчете имам хатибы Наил хәзрәт Кәримуллин. - Җеназаханә ачу уе белән мәчетнең имамы булган мәрхүм Шамил абый Исхаков та йөргән иде. Ул вакытта бу эш ничектер барып чыкмады. Улы Камил Исхаков инициативасы белән, узган ел ахырында без аны ачтык та. Шәһәр шартларында җеназаны Аллаһ хозурына озату мәшәкате күбрәк. Шуңа да без җеназаханәне кешеләргә уңайлы булсын өчен булдырдык. Биредә мәетне юарга бөтен мөмкинлекләр дә бар, теләсәләр, үзләре дә юа ала, кирәк икән, мәетне юучыларыбыз да бар. Кәфенлекләр дә бирәбез, аны хәстәрләп өлгермәүчеләргә дә җайлы бу.

Мондый хезмәт моргларда да бар, диючеләр табылыр. Наил хәзрәтнең моңа да үз җавабы.
- Мәет юарга моргка үземнең дә барганым бар. Анда хатын-кызны ир-ат юа, ике-өч өстәлдә берьюлы берничә кешене юалар. Дини таләпләр буенча, мәетне юуның үз кагыйдәләре бар. Аллаһ каршына ул госелле килеш барырга тиеш. Аны юучыларның да тәһарәтле булуы шарт. Монда исә мәетне соңгы юлга озату бөтен шартларына туры китереп эшләнә. Киләчәктә мәетне зиратка алып бару өчен махсус автобус булдыру уе да бар, - диде ул безгә.