Казанда «Тукай урамы» бәйрәме уздыралар

«Иске шәһәр» территориясе префекты Марат Усманов Казан шәһәре мэриясендә узган «эшлекле дүшәмбе» киңәшмәсендә хәбәр иткәнчә, бәйрәмне ачу татар шагыйре музее ишегалдындагы яңа сәхнә мәйданчыгында узачак.
Биредә «Фантазия» хатын-кызлар джаз-оркестры чыгышы, Галиәсгар Камал исемендәге татар академия театры артистлары катнашында әдәби спектакль планлаштырылган, шулай ук Габдулла Тукай исемендәге академия театрының «Илһамият» клубы артистлары татар халык җырларын һәм бөек шагыйрь шигырьләрен башкарачак.

– Музейда бу көнне күзәтү экскурсияләре, тематик мастер-класслар узачак, ә теләүчеләр өчен 10.00 сәгатьтә Юныс мәйданында «Тукай юлы» дип аталган велотур старт ала. Экскурсия­дә катнашыр өчен алдан язылырга кирәк. Шулай ук 12.00 сәгатьтә «Екатерининскийдан Тукай урамына кадәр» дип аталган җәяүле экскурсия оештырылачак, аның барышында урамның тарихы һәм истәлекле урыннары турында сөйләячәкләр, – дигән Марат Усманов.

Казан мэры Илсур Метшин урам бәйрәмен үткәрү идеясен югары бәя­ләде, аны көтелмәгән, әмма игътибарга лаек дип атады.
 
– Без Тукай урамы белән генә чикләнмәбез дип уйлыйм. Кызык­лы чаралар шәһәр үзәгендә, турист­ларны җәлеп итәрлек маршрутларда гына узарга тиеш түгел, бөтен шәһәр мәдәни чаралардан кайнарга тиеш, – дип билгеләп үтте ул һәм район администрацияләре башлык­ларын алда торган бәйрәмдә катнашырга һәм яңа идеяләр белән бүлешергә чакырды.
Марат Усманов шулай ук июнь аеннан башлап Кабан күле яр буенда шәһәр халкы һәм туристлар яратып өлгергән Water-Film проекты эшли башлаячагын әйтте һәм шәһәр халкын әлеге чараларга да чакырды.