Хирурглар бер баланың ашказаныннан 117 магнит шары чыгарган

Мәскәүдә Сперанский исемендәге 9 нчы балалар хастаханәсе хирурглары бер яшьлек баланың ашказаныннан 117 магнит шарын чыгардылар, дип хәбәр итә башкала сәламәтлек саклау департаменты матбугат хезмәте.

"Бер яшьлек малайны Мәскәү сәламәтлек саклау департаментының Г. Н. Сперанский исемендәге 9 нчы балалар хастаханәсенә ашыгыч рәвештә китергәннәр - сабый магнит конструкторындагы шарларны йоткан икән. Югыйсә, малай апасы янында уйнап торган. Һәм әниләре уенчыклар җыя башлагач кына, магнит конструкторы җыелмасының өлешләре җитми булып чыккан", - диелә хәбәрдә.

Билгеләп үтелгәнчә, әти-әниләр кичекмәстән ашыгыч ярдәм чакырткан, һәм фельдшерлар ике баланы да стационарда тикшерергә карар кабул иткән. Рентген тикшеренүен уздырганнан соң кызны шунда ук өйләренә кайтарып җибәргәннәр, аңарда берни дә табылмаган. Ә аның кече энесен ашыгыч рәвештә операция бүлмәсенә китергәннәр - малайның ашказанында магнит шарлары җыелуы күренгән.

"Махсус инструментлар белән без пациентның ашказаныннан 117 вак чит предметларны чыгардык. Бәхеткә, магнит шарлары бер-берсенә тартылып ашказаны функциясен бозарга өлгермәгән. Операциядән соң сабыйны антибактериаль, инфузион терапиясе билгеләгәннәр. Хәзер бала белән бар да тәртиптә, ул савыкты", - дип сөйли хирургия бүлеге мөдире Нодари Зурбаев.

Сперанский исемендәге балалар хастаханәсе белгечләре кечкенә балаларны өлкәннәр контроленнән башка гына вак предметлар белән уйнарга рөхсәт итмәскә киңәш итә.

Фото: http://pixabay.com