Конфедерацияләр Кубогы өчен җавап биргән Республика клиник хастаханәсе, Казанның 7нче клиник хастаханәсе ФИФА оештыручыларыннан югары бәя алган. Татарстанның сәламәтлек саклау министры Адель Вафин сүзләренчә, республика медицина өлкәсендә инде Кубокка кадәр яхшы тәэмин ителгән булган.
- Без Универсиада, Дөнья чемпионатлары вакытында тәҗрибә тупларга өлгердек. Республиканың 222 медицина хезмәткәрләре Сочида узган Олимпиада, паралимпиада уеннарында эшләде, - ди министр.
Конфедерацияләр Кубогының баш табибы Арслан Вәлиев сүзләренчә, ФИФАның таләпләре Олимпиадага караганда да зуррак. Биредә дарулар составыннан алып, ашыгыч ярдәм машинасы килү, ярдәм күрсәтү вакытына кадәр билгеле бер вакыт белән чикләнгән. Медицина хезмәткәрләре исә спортчыларга ярдәм күрсәтү өчен аерым дәресләр алган.
Бүген Кубокта барлыгы 385 медицина хезмәте эшли. Уен көнендә 130 белгеч кизү тора. Алар барысы да инде Универсиада вакытында инглиз теле дәресләре алган. Матчлар башланыр алдыннан 5 июнь көнне Татарстан Президенты Рөстәм Миңнеханов Сәламәтлек саклау министрына 45 заманча ашыгыч ярдәм машинасы ачкычы тапшырды. Дөнья чемпионатында да алар кулланылачак. Матч көннәрендә "Казан-Арена"да 11 ашыгыч ярдәм машинасы кизү тора. Тагын бишәр машина спортчылар яшәгән кунакханәләрдә, чикләү территориясендә торачак.
2 июньнән Кубокта эшләгән табибларга 245 кеше мөрәҗәгать иткән.
- Гадәттә мөрәҗәгатьләр оештыручы, Кубокта эшләгән кешеләрдән килә. Әйтик, табиб күзәтүе астында булганнарның 16сы - ФИФА кешесе, 9зы - волонтер, 2се журналист, 32се тамашачы. Гадәттә, баш авыртулары, кан басымы күтәрелү, ОРВИдан зарланалар. Җәрәхәт алучылар да булды. Нинди авырулар белән мөрәҗәгать итсәләр дә, безнең дәваларга бөтен әйберебез бар, - диде Адель Вафин.
Һәр зур чарадагы кебек, бу юлы да Казан ВИЧ инфекциясенә тикшеренү үзәге ачкан. Шулай итеп үзеңне "Родина" кинотеатрында бушлай тикшереп була. Универсиада вакытында читтән килүче җанатарларда экзотик авырулар да ачыкланган булган. Министр сүзләренчә, әлегә Кубокта андый очрак күзәтелмәгән.
Конфедерацияләр Кубогы вакытында медицина тәэмин ителеше өчен республика бюджетыннан 200 миллион сум акча тотылган.
Комментарийлар