Прививка баласызлыкка китерәме?

Вакцина ясату пунктларында чиратларны да, вакцина җитешмәгән очракларны да күзәтергә мөмкин икән. Шулай да әлеге мәсьәлә буенча шикләнүчеләр һәм тискәре караучылар җитәрлек. Шик-шөбһәләргә ачыклык кертү һәм сорауларга җавап бирү максатыннан, Татарстан Сәламәтлек саклау министрлыгының терапия буенча штаттан тыш баш белгече, Татарстан Республикасының атказанган табибы, медицина фәннәре докторы Диана Абдулганиева чыгышн тыңладык.

COVID-19 белән авырганнан соң, кешеләрдә арыганлык, баш авырту, фикер һәм игътибар туплый алмау, чәчләр коелу, тын кысылу – иң еш күзәтелә торган билгеләр.
– Гадәттә, кешеләр интернеттан укып, төрле уйдырмаларга ышаналар. “Вакцина ясатканнан соң, балага уза алмыйлар; җенси теләк кими яки бөтенләй бетә; организмга чит геннар кертәләр; биочип урнаштырып, кешенең үз-үзен тотышы белән идарә итәчәкләр; вирусның эксперименталь штаммын йоктырачаклар; COVID-19 ныклап зарарласын дип, организны махсус көчсезләндерәләр” – боларның берсе дә дөреслеккә туры килми, - ди Диана Абдулганиева. – Ә җенси теләк кимү – ул таҗлы вирусны кичерү нәтиҗәсе.

– Сезонлы аллергия – прививка ясатырга ярамый дигәнне аңлатмый. Бары ярсыткычлар бар вакытта кичектереп торырга кирәк. Әгәр балага узарга планлаштырасыз яисә хатын-кыз йөкле икән, бөтен гаилә әгъзалары да кичекмәстән вакцинация узарга тиеш. Авырлы ханымнарны дәвалау бик авыр һәм кызганыч нәтиҗәләргә китерүе ихтимал, - ди табиб. 

Дания НӘГЫЙМ