«Балабызның үлем сәбәбен беләсебез килә»

Чаллыда КДМЦга кергәннән соң берничә сәгать узгач, биш яшьлек бала үлгән. Шау-шу куптарган фаҗига 8 апрельдән 9 апрельгә каршы төндә килеп чыккан. 
Баланы медицина учреждениесенә ОРВИ диагнозы белән китергәннәр. Берничә сәгатьтән ул вафат булган. Әти-әнисе кара кайгыда, ләкин булган хәлдә кемнеңдер гаебе бармы – юкмы икәнен ачыкларга телиләр.

«Челнинские известия» басмасы баланың әнисе белән аралашып алган, вафат булган Арина гаиләдә бердәнбер бала булган.

"Шат күңелле, үзсүзле, һәрвакыт барысына да ирешә торган иде. Әгәр нәрсәнедер бик тели икән, үзенекен эшләмичә беркайчан да чигенмәде. Кызыксынучан булып үсте, китаплар карарга яратты. Мөстәкыйль булды. Бакчага барганда үзе киенеп куя. Анда яхшы исәптә булды. Малайлар белән дуслашуны кулайрак күрә, аңа хәрәкәтчән, актив уеннар ошый иде», – дип сөйләгән әнисе.

Баласын югалткан әни сүзләренчә, Арина сәламәт бала булып үскән. «Әлбәттә, салкын тиеп авыргалады, әмма бернинди хроник авырулар, бернинди аллергияләр белән интекккәнебез булмады», – дигән ул.

Фаҗигагә берничә көн кала кызның температурасы күтәрелгән. Ул артык югары булмаган, 37 градустан бераз югарырак. Бала үзе хәтта авыруга да игътибар итмәгән. Уйнавын дәвам иткән. Ашау ягыннан да үзгәрешләр сизелмәгән.

Әни исә, терелгәнче өйдә утыру яхшырак, дип карар кылган һәм поликлиникадан педиатрны чакырткан.
"Гадәттә без түләүле медицина ярдәме сорап мөрәҗәгать итәбез. Ә монда педиатрны беркетелгән поликлиникадан чакыртырга булдык. Безгә бит балалар бакчасына бармагыныбыз өчен белешмә кирәк иде", - дигән әни.

Табиб килгән, баланы караган, ОРВИ диагнозын куйган, дарулар өчен рецепт язып биргән. анда гадәти булмаган бернәрсә дә булмаган. Гадәти препаратлар, больничный ачылган. Атна ахырына икенчел кабул итүгә килергә кирәк, дүшәмбе көнне инде бакчага барырга мөмкин булачак, дигән.  Бу 5 апрель көнне булса, 8 апрельдә баланың күз кабаклары шешенә башлаган.

"Арина үзе бернәрсәгә дә зарланмады-уйнавын дәвам итте. Ләкин без ашыгыч ярдәм чакырырга булдык. Ашыгыч ярдәм тиз килде – нибары ун минут эчендә. Карадылар да, КДМЦга алып барырга кирәк, диделәр. Мин кызым белән киттем. Алга таба-кабул итү бүлмәсе, карау, анализлар тапшыру. Аринаны палатага салдылар. Аның янында әтисе калды. Берникадәр вакыттан соң аның хәле начарлана башлаган. Капельница куйганнар. Ә иртән реанимациягә алып киттеләр. Без ишек төбендә көтеп утыра идек. Ә аннары чыктылар да Арина үлде, диделәр. Хәзер полиция киләчәк, диделәр,  Хокук саклаучылар шулай ук табиблардан сорау алган, - дип сөйләгән баланың әнисе.

Аринаны җирләгәннәр. Аның гаиләсе, шул исәптән әбисе һәм бабасы, әлегә кадәр шок хәлендә. Сабыйны югалту белән берничек тә килешә алмыйлар.
"Без хастаханәгә килдек, кызны тәҗрибәле белгечләр кулына бирдек, ә ул берничә сәгатьтән вафат булды", - дигән кайгыга баткан әни.
Бала үлемен тикшерү барышында ата-аналар мәнфәгатьләрен адвокат Инзилә Әхәтова яклаячак. Адвокат сүзләренчә, саксызлык аркасында үлемгә китерү факты буенча җинаять эше кузгатылган (РФ Җинаять кодексының 109 маддәсе).