Рамзан Кадыйров: «Мәдинәдә теракт оештыручыларны Аллаһ каргасын!»

Террорчы мәчет территориясенә ахшам намазы вакытында керә алмагач үз-үзен мәчет һәм суд аралыгындагы парковкада шартлаткан. Бу вакытта мәчеткә меңләгән кеше җыелган булган.

Моңа кадәр Согуд Гарәбстанның көнчыгышында урнашкан Әл-Катиф шәһәрендә дә боевиклар һөҗүме булган. Биредә һәлак булучылар юк.

Бүген Галиев мәчетендәге Ураза гаете вәгазендә Татарстан Республикасы Диния назәрәте рәисе, мөфти Камил хәзрәт Сәмигуллин теракт оештыручыларны «шайтаннар» дип атады.

- Аларның динебезгә катнашы юк, алар мөселман түгел, - диде мөфти. Ул, мисал итеп, Мөхәммәд пәйгамбәр хәдисен китерде. Хәдисләрнең берсендә исемнәре урынына кушаматлар гына булган кешеләр төркеме барлыкка килү турында әйтелә. Алар үз араларында ызгыш чыгып, таркалышып бетәрләр диелә.

Террор хакында Чечня Республикасы башлыгы Рамзан Кадыйров та Инстаграм социаль челтәрендә үз фикерен белдергән.

- Изге Мәдинәдә теракт оештыручылар мең тапкыр каргалсын! Аларны Аллаһы Тәгалә каргасын! Пәйгамбәр мәчете янәшәсендә оештырылган шартлауга карата безнең йөрәкләр ачу белән тулы. Террорчылыктан бердәм көч ярдәмендә генә котылып булачак. Без ярдәм итәргә әзер, - дип язган Кадыйров.

^{_{Чыганак: Татар-информ}}