“Созвездие-Йолдызлык” гаиләсендә тәрбияләнгән балаларның күңеле чиста

Нәкь шул көннәрдә җиңүчеләр билгеләнәчәк. “Созведие-Йолдызлык” фестивале 23 ел дәвамында сәләтле яшьләрне зур сәхнәгә чыгара. Фестивальдә 1,3 милионнан артык бала катнашкан. Бу сан Казанда яшәүчеләр санына якын. Күз алдына китерегез, бөтен Казан халкы сәхнәдә җырлаган, биегән.

– Бөтен районнарда сайлап алу турлары узды. Һәр елны сыйфат ягыннан да чара камилләшә, катнашучылар саны да арта. Бездә 170тән артык милләт вәкиле яши. Һәрберсенең жырларын сәхнәдән тыңласак та, нинди байлыкка тап булачакбыз. Фестиваль һичшиксез озын гомерле булачак, – диде жюри әгъзасы Зилә Сөнгатуллина

Татарстанның яшьләр эшләре министры Ринат Садыйков, фестивальне финанслауга кагылышлы саннарны әйтеп үтте: “Ел саен “Созведие-Йолдызлык” фестиваленә 84 миллионнан артык акча бүлеп бирелә. Быел өстәп 9 миллионны остаханәләр булдыру өчен күчерелде”, – диде ул. 

– Һәр этапта район җитәкчеләре булды. Алар барысы да балалар өчен янып-көеп торды. “Созвездие-Йолдызлык” гаиләсендә тәрбияләнгән балаларның күңеле чиста. Бу проект – тәрбия мәктәбе. Ата-аналарга, балаларга һәм жюри әгъзаларына рәхмәт әйтәбез. Жюри 8-14 сәгать буе балаларны бәяләп, һәрберсенә игътибар бирәләр. Бәйгенең дәрәҗәсе шуның кадәр зур ки, хәтта “Созвездие-Йолдызлык”та катнашкан бала, укытучы, ата-ана үзе белән горурлана ала, – диде Татарстан Рәисе каршындагы Мәдәниятне үстерүгә ярдәм фонды башкарма директоры Нурия Хашимова. 

“Созведие-Йолдызлык” фестиваленең атасы – Дмитрий Туманов. “Бу бердәнбер бушлай уза торган эстрада фестивале”, – дип ассызыклады ул.
19 апрель “Пирамида”да “Созвездие-Йолдызлык”ның гала-концерты Татарстан Республикасы Рәисе катнашы белән узачак дип көтелә.