Студент балалары булган әти-әниләр картлык һәм инвалидлык буенча пенсиягә өстәмә алырга хокуклы

Көндезге бүлектә укучы студентларның әти-әниләре картлык һәм инвалидлык буенча пенсиясенә өстәмә акча кушылып түләнелә, дип хәбәр иткән идек. “Шәһри Казан” газетасы хәбәрчесе әлеге түләүнең Татарстанга да кагыламы икәнлеген белеште. РФ Пенсия Фондының ТР буенча бүлекчәсе матбугат хезмәте җитәкчесе Альбина Никандрова сүзләренчә, өстәмә пенсия Россиянең барлык төбәкләрендә дә түләнелә. 2021 елда ул 2014 сумны тәшкил итә. Әлеге сумма ел саен индексацияләнә.

Арттырылган пенсия алу хокукына көндезге бүлектә укучы студентларның (23 яшькә кадәр), шулай ук 18 яше тулмаган балаларның ата-аналары ия. Балага 18 яшь тулгач, алар аның югары уку йортында укуы һәм эшкә урнашмавы турында белешмә тәкъдим итәргә тиеш. Моның өчен Пенсия фондына мөрәҗәгать итәргә кирәк.