Танылган артист Николай Губенко вафат

РСФСРның халык артисты, Мәскәү думасы депутаты Николай Губенко 78 яшендә вафат булды. Россия Президенты Владимир Путин, Мәскәү мэры Сергей Собянин, артистлар һәм сәясәтчеләр кайгы уртаклаша. Бу турыда РИА Новости хәбәр итте.

Николай Губенко үлеме хакында Мәскәү думасы рәисе Алексей ШапошниковТвиттерда язды. Артист йөрәге туктаудан үлгән, диелә бу хәбәрдә.

Россия Президенты Владимир Путин мәрхүмнең туганнарының кайгысын уртаклаша. Бу турыда Президентның матбугат сәркатибе Дмитрий Песков әйткән. 

«Бүген Мәскәү шәһәр думасы депутаты, халык артисты, режиссер, „Содружество актеров на Таганке“ театры җитәкчесе Николай Губенко вафат. Николай Николаевич бик яхшы кеше иде. Туганнарының һәм якыннарының кайгысын уртаклашам», — дип яза Сергей Собянин социаль челтәрләрдә. Бу турыда Мәскәү мэрының рәсми сайтында хәбәр ителә.

Губенко 1980 елларда документаль фильмнарда Владимир Ленин рольләрен тавышландырган. Быел яз көне хатыны белән икесе дә коронавирус йоктырып авырган булган. Бу турыда «Интерфакс» хәбәр итте.

Николай Губенко «Они сражались за Родину», «Когда улетают аисты», «Пароль не нужен», «Первый курьер», «Пришел солдат с фронта», «Если хочешь быть счастливым», «Прошу слова» и «Подранки» фильмнарында уйнаган.

Кинорежиссер буларак ул «Пришел солдат с фронта», «Если хочешь быть счастливым», «Подранки», «Из жизни отдыхающих», «Запретная зона», «И жизнь, и слезы, и любовь» фильмнарын төшергән.

Чыганак: Интертат