Танылган музыкант чаңгыда бозлы су астына китеп һәлак булган

Музыкант Александр Липницкий, «Звуки Му» төркеменең элеккеге катнашучысы Мәскәү өлкәсендә һәлак булган. Ул чаңгыда йөргәндә бозлы суга төшеп киткән һәм батып үлгән. Бу турыда ТАСС агентлыгы хокук саклау органнарындагы чыганагына сылтама белән хәбәр итте.

«Пәнҗешәмбе көнне бер ир-ат Мәскәү елгасы бозы өстендә чаңгы шуа. Ул бер мизгелдә боз астына төшеп китә һәм батып үлә. Мәрхүм ир-ат — музыкант Александр Липницкий», — дигән агентлык чыганагы.

Александр Липницкий музыка тәнкыйтьчесе һәм журналист иде, диелә хәбәрдә.

Мәрхүмнең хатыны Инна сүзләренчә, Липницикийның мәетен тапмаганнар әле. Ул эте белән бергә булган. «Күз алдында боз астына төшеп китте», дигән шаһитлар. Бу турыда РЕН ТВ хәбәр итте.

«Аны үле килеш күргәннәр. Полиция аның судан йөзеп баруын да күргән, аннары ул күз алдында су астына киткән. Ул үлгән инде, мәете боз астына киткән, аны кичә тапмадылар, хәзер дә эзлибез», — дигән Инна Липницкая.

Башта Липницкийның хатыны ире югалу турында полициягә мөрәҗәгать иткән. Ул иренең көндез этен ияртеп, чаңгыда йөрергә китүен, әйләнеп кайтмавын сөйләгән.

Мәрхүмнең дусты, критик Артемий Троицкий бүген хәбәр иткәнчә, Липницкий суга төшеп киткән этен коткарганда һәлак булган.

Чыганак: Интертат