Татарстан халык санын алуда катнашу буенча алдынгы төбәкләр арасына керде

2021 елгы Бөтенроссия халык санын алу кампаниясендә катнашу буенча Татарстан Республикасы алдынгы төбәкләр арасына керде.
Росстат башлыгы Павел Малков Россия Президенты Хөкүмәт әгъзалары белән үткәргән киңәшмәдә шулай дип белдерде.

«Бүгенге көндә җанисәптә Россиядә яшәүче 133,5 миллион кеше катнашкан, бу ил халкының 91,6 проценты дигән сүз», — дип искәртте спикер.
Мәскәү шәһәре һәм өлкәсендә, Санкт-Петербургта, Төньяк Кавказда эш тәмамланган диярлек, Чечен Республикасында халык санын алучылар Россиядә беренчеләрдән булып барлык өйләрне йөреп чыккан. Ставрополь һәм Краснодар крайлары, Волгоград һәм Тула өлкәләре, Мордовия һәм Чукоткада да җанисәп тәмамлану алдында.

«Татарстан һәм Башкортстанда да бик яхшы бара. Болар барысы да лидерлар», — дип искәртте Малков.
Бөтенроссия халык санын алу кампаниясе 15 октябрьдә башланды, ул 14 ноябрьгә кадәр дәвам итәчәк. Бу — 2002 һәм 2010 еллардан соң Россиянең яңа тарихындагы өченче җанисәп.

Илдә яшәүче һәркем Дәүләт хезмәтләре порталында, күп функцияле үзәкләр яки стационар исәпкә алу участокларында үзен һәм үз гаиләсен мөстәкыйль рәвештә терки ала. Шул ук вакытта, җанисәпнең традицион форматы да (өйләр һәм фатирлар буенча йөрү) сакланды.
Россия Президенты Владимир Путин, РФ Премьер-министры Михаил Мишустин һәм Татарстан Президенты Рөстәм Миңнеханов халык санын алу кампаниясендә катнашты инде.
https://tatar-inform.tatar