Татарстанда беренче йөзмә һәм күчмә ягулык салу станциясе эшли башлады

"Әлеге ягулык салу станциясе җәй көне дә, кыш көне дә эшли. Аның өстенлекле яклары шунда: биредә һава суднолары, кар машиналары һәм квадроцикллар ягулык сала ала. Җәен монда яхталар, катерлар да өстәлә алачак», - дип сөйләде «Аракчино - Югары Ослан» боз кичүе башлыгы Илдар Насыйров. 

Ул билгеләп үткәнчә, бу - Татарстанда эшли торган бердәнбер йөзмә ягулык салу станциясе. Төп өстенлек - катер хуҗаларына яки кар машиналарына ягулык салу өчен ярга чыгарга кирәкми. Балыкчылар һәм яхтсменнар үз судноларына 92нче маркалы бензин һәм дизель ягулыгы сала алачак. Ягулык бәясе базар бәясенә тиң. Хәзер ягулык салу станциясе иртәнге 8дән кичке 5кә кадәр эшли, җәйгә станциянең тәүлек буе эшләвен оештыру планлаштырыла. 

Станциягә ягулык салу ябык режимда башкарыла, бу экологик яктан куркынычсыз ысул булып санала. Ягулык салу станциясенең экологик куркынычсызлыгы өчен «Авария-коткару һәм экологик операцияләр үзәге» АҖ филиалының «Экоспас» Самара үзәгенең Татарстан бүлекчәсе җавап бирә. 

"Без нефть һәм нефть продуктларының мөмкин булган аермаларын локальләштерү һәм бетерү белән шөгыльләнәбез. Станция суда булганга, без су өчен билгеләнгән җиһазларны кулланабыз, шулай ук бездә боз өчен җиһазлар да бар. Су өстендә авария булган очракта, аны 6 сәгать эчендә хәл итәргә бурычлы", - дип сөйләде "Экоспас" Татарстан бүлекчәсе җитәкчесе Тимур Фәхриев.