Татарстанда мәҗбүри вакцинация кертелде. Кемнәргә?

"Татар-информ" мәгълүмат агентлыгына Татарстан буенча Роспотребнадзор идарәсендә хәбәр итүләренчә, тиешле карарны республиканың баш санитар табибы Марина Патяшина имзалаган.
Республикада 60 яшь һәм аннан өлкәнрәк кешеләр, медицина, мәгариф һәм социаль учреждениеләр хезмәткәрләре, транспорт оешмалары һәм энергетика өлкәсе, сәнәгать һәм төзелеш предприятиеләре, авыл хуҗалыгы оешмалары хезмәткәрләре, хокук саклау органнары хезмәткәрләре, дәүләт һәм муниципаль хезмәткәрләр мәҗбүри вакцинация үтәргә тиеш. Бу шулай ук чәчтарашханә, мунча, спорт учреждениеләре, көнкүреш хезмәте күрсәтү объектлары, сәүдә һәм җәмәгать туклануы, банк, почта, такси, кәрәзле элемтә салоннары, ТКХ өлкәсе оешмалары хезмәткәрләренә дә кагыла.

Моннан тыш, мәҗбүри вакцинация музей, кино, концерт һәм күргәзмә заллары, китапханәләр, ял һәм күңел ачу үзәкләре, балалар лагерьлары, туризм өлкәсе, массакүләм мәгълүмат чаралары, даруханәләр, ветеринария клиникалары, кунакханәләр, автосервис, илтеп җиткерү хезмәтләре хезмәткәрләренә, вуз һәм вузлардан читтә җитештерү практикасын узучы студентларга кагыла.
6 декабрьгә кадәр оешма җитәкчеләре хезмәткәрләрне икенче компонент белән вакцинацияләүне тәэмин итәргә тиеш.

"9 ноябрьдән вакцинацияләүнең беренче этабын узмаган хезмәткәрләр эштән азат ителергә тиеш. 7 декабрьдән бу яңа коронавирус инфекциясенә каршы вакцинаның икенче компонентын алмаганнарга да кагыла", - дип аңлатканнар агентлыкка Роспотребнадзор идарәсендә.

Медицина күрсәткечләре буенча вакцина ясатырга ярамаганнарга бу карар кагылмый, диелә хәбәрдә.