ВИЧ инфекциясе турында нәрсә белергә кирәк?

– Бүген вируслы инфекция ияртү куркынычы һәркайда да бар. Әле күптән түгел генә бер кыз безнең үзәктә анализ нәтиҗәләрен алгач, барысы да яхшы булуына сөенеп, хезмәткәрләребезгә рәхмәт әйтергә тотынды. Баксаң, маникюр ясатканда инструментлар аша йогышлы авыру иярмәдеме икән дип борчылган икән, – ди Татарстан Сәламәтлек саклау министрлыгының йогышлы авырулар һәм СПИД белән көрәш һәм профилактика буенча республика үзәге баш табибы Нияз Галиуллин.

ВИЧ йоктыручыларның күбесе 30-50 яшьтәге эшкә сәләтле кешеләр, араларында хатын-кызлар күбрәк. Халык арасында аңлату эшләре алып бару нәтиҗәле, дип саный Нияз Галиуллин. Әйтик, уку йортларында, оешмаларда СПИДның, ВИЧ инфекциянең зыяны турында лекцияләр укыганнан соң ВИЧка тест узарга теләүчеләр саны бермә-бер арта икән. Сүз уңаеннан, шушы көннәрдә генә Татарстан Сәламәтлек саклау министрлыгының йогышлы авырулар һәм СПИД белән көрәш һәм профилактика буенча республика үзәге “Россия күләмендәге “Иң яхшы СПИД үзәге” бәйгесендә “Һәркемгә кагыла” номинациясендә нәкъ менә халыкка аңлату эшләре алып бару нәтиҗәләренә карап беренче урынны алган. Шулай да барыбер мәгълүмат җитәрлек дәрәҗәдә түгел, дип саный белгечләр. Бүген йогышлы авырулар хакындагы мәгълүмат белән халыкның 81 проценты гына таныш.

Психолог Светлана Изамбаева:
– Лекцияләр вакытында күпләр СПИД, ВИЧ инфекциясе чебен-черки, үбешкәндә күчә дип саный. Ләкин бу ялгыш фикер. Вич бары кешедә генә очрый. ВИЧлы кешеләр башкалар кебек үк белем алырга, эшкә урнашырга хокуклы, башкалар белән тигез дәрәҗәдә икәнен дә күпләр белеп бетерми,– ди ул.
Үзе дә 15 ел ВИЧ инфекцияле Светлана бар кешеләрне дә ВИЧка тест үтәргә чакыра. Авыруны вакытында ачыкласаң, дәваланырга, авыруны аздырмый калырга була. Тиешле дарулар эчсәң инфекция беркайчан да СПИДка әйләнмәячәк. Авыру хатын-кызлардан сәламәт балалар туачак. “Иң мөһиме – үз эчеңә бикләнмәскә”, – ди Светлана.
Кешедә ВИЧ инфекциясен кан, селәгәй аша да билгели алалар.

ВИЧ инфекциясе, СПИД турында белергә кирәкле өч факт:

1. СПИДтан кеше үлми, инфекция китереп чыгарган авырулар нәтиҗәсендә генә вафат булырга мөмкин.
2. Инфекция җенси мөнәсәбәтләр вакытында, каннан канга, күкрәк сөтеннән балага күчә.  
3. Җенси мөнәсәбәтләр вакытында инфекциядән саклый торган иң ышанычлы чара – презерватив дип санала.

Быелның 1 декабренә алынган мәгълүматлар буенча Татарстанда ВИЧ инфекцияле 22 мең 191 кеше санала. Барлыгы 145 балада ВИЧ ачыкланган.Ел саен дөньяда 3 миллон кеше дә ВИЧ инфекциясе ачыклана. Авырудан һәр ел 2,5 миллион кеше вафат була.