Владимир Путин БДБ илләре лидерларын «Киләчәк уеннары»н ачуга чакырды

Россия Президенты Владимир Путин БДБ илләре лидерларын «Киләчәк уеннары» халыкара мультиспорт турнирын ачуга чакырды. Ярышлар ТР башкаласында 21 нче февральдә башлана, 3 нче мартта тәмамлана.

«Киләсе елның февралендә Казанда инновацион «Киләчәк уеннары» узачак – бу Россия тәкъдим иткән спорт чараларының яңа форматы, ул динамик спорт дисциплиналарын һәм киберспортны берләштерә, – диде Владимир Путин, БДБ илләре лидерларының рәсми булмаган очрашуын ачып. – Барыгызны да «Киләчәк уеннары»н ачу тантанасына хөрмәтле кунаклар буларак чакырасым килә.

РФ Президенты сүзләренчә, спорт һәм физик культура – гуманитар хезмәттәшлекнең аерылгысыз өлеше. Владимир Путин шулай ук хезмәттәшләренә Белоруссиядә БДБ илләренең II Уеннарын уңышлы оештырганнары һәм үткәргәннәре өчен рәхмәт белдерде, аның сүзләрен «РИА Новости» җиткерә.

Исегезгә төшерәбез, «Киләчәк уеннары» 2024 елның 21 нче февраленнән 3 нче мартына кадәр Казанда узачак. Ярышлар 21 гибрид дисциплинаны берләштерәчәк. Аларның һәрберсе фиджитал концепциясен берләштерә, ягъни классик спорт һәм киберспорт яки VR-/AR-технологияне үз эченә ала. ТР башкаласына 100 илдән 2,5 меңнән артык катнашучы киләчәк, ә бөтен дөнья буенча онлайн-тамашачылар 150 миллионга кадәр кеше булыр дип көтелә. Бу хакта Казан Мэриясе сайты хәбәр итә.