Яшьләр быел да тик тормый

- Узган ел нәтиҗәләре буенча Казан үзен кабат яшьләр арасында гомумроссия һәм халыкара дәрәҗәдәге ярышларны кабул итүче Россиядә иң яхшы шәһәр буларак күрсәтте. Глобаль шейперларның Евразия очрашуы, Бөтендөнья татар яшьләре форумы, IV Россия-Әзербайҗан яшьләр форумы кебек зур чаралар бездә югары дәрәҗәдә оештырылды. 2016 ел ахырына Татарстанда рәсми рәвештә 68 яшьләр һәм 74 балалар иҗтимагый оешмалары теркәлде. Соңгы биш ел эчендә аларның саны 26 процентка артты, - диде Татарстанның яшьләр эшләре һәм спорт министры Владимир Леонов.

Министрлыкның ел дәвамында башкарган проектлары күп төрле. Бүген аларның берничәсенә генә тукталып китәрбез. 2016 елда яшьләр сәясәтендә зур үзгәреш булды - республикада Татарстан премьер-министры Илдар Халиков инициативасы белән Яшьләр хакимияте барлыкка килде. Бу орган яшьләр белән җитәкчеләр арасында элемтә булдырачак.

- Әле өч ай гына эшләвебезгә карамастан, инде республиканың 13 министры белән очраштык. Әлеге очрашулар нигезендә ике ел эшчәнлеккә план төзедек, - диде Татарстан Республикасының Яшьләр хакимияте рәисе урынбасары Александр Данилов.

Апрель аенда республика Яшьләр хакимиятенең IX бөтенроссия съездын кабул итәчәк. Ил өчен әһәмиятле кадрлар резервын туплау мәсьәләсе яшьләр өчен төп тема булып торачак.
«Бердәм Россия»нең Яшь гвардиясе» Бөтенроссия иҗтимагый оешмасының Татарстан төбәк бүлегенең дә үзгәрешләре бар. Хәзер алар ил күләмдәге мәсьәләләрне хәл итә ала. Узган ел дәвамында оешма спорт, студентлар хәрәкәте, ватанпәрвәрлек рухын тәрбияләү кебек юнәлештә төрле чаралар оештырган.

- Быелдан төп юнәлешләрнең берсе - муниципаль үзәкләрдәге яшьләр белән эшләү булачак. Районнарда яшьләр хокукын яклаучы вәкәләтле вәкил вазифасына конкурс игълан итәбез. Шулай ук "МедиаГвардия" федераль проекты ярдәмендә интернет аша хокук бозучыларны ачыклыйбыз, - диде «Бердәм Россия»нең Яшь гвардиясе» Бөтенроссия иҗтимагый оешмасының Татарстан төбәк бүлеге җитәкчесе Динар Бариев.

Якын киләчәктә Казан тагын дөньякүләм танылган берничә чара кабул итәргә мөмкин. Шуларның берсе - 2018 елда Парламент дебатлары буенча Евразия чемпионаты. Икенчесе - 2019 елда Парламент дебатлары буенча Европа чемпионаты. Бу ике чарага да 50 илдән 400гә якын дөньяның иң интеллектуаль яшьләре җыелачак.

Дебатларда яңа законопроектлар турында бәхәсләшәләр. Аның нәтиҗәләре республиканың Дәүләт советына да ирештерелә. Узган елны Татарстан дебатчылары 11 дебатның алтысын җиңеп команда зачетында Россия буенча беренче урын алды. Шунысы игътибарга лаек - дебатчылар үз телләреннән тыш инглиз телен дә камиль белә. Узган елның октябрендә Татарстан егете Михаил Шуганов Оксфорд, Гарвард, Сорбонна студентлары белән бер рәттә ярышып дөньякүләм ярышның ярымфиналына чыкты. Быел 16 март көнне Идел буе федераль округы буенча ярышларда безнекеләр шулай ук җиңү яулый. Хәзерге вакытта дебатчылар Парламент дебатлары буенча III Татарстан Кубогына әзерләнә.