Югалган баланы психик авырулы хатын-кызның өеннән үле килеш тапканнар

Вологда халык ике көн хәбәр көтеп яшәде. 9 яшьлек Соня югалгач, аны берничә йөз кеше эзләде. Ахырга кадәр могҗизага ышандылар. Тик... могҗиза булмады. Кызны психик авырулы хатын-кызның өеннән үлгән килеш табып алдылар, дип яза “Российская газета”.

Соняның әнисе кызы югалуны икенче көнне генә белеп алган. Аның ничек югалганын да белми, чөнки спиртлы эчемлекләр кулланган. Эзләүчеләр иң элек Соняның алсу төстәге рюкзагына юлыккан. Аның эчендәге дәфтәрдә кызның исем-фамилиясе язылган булган. Соняны шул рюкзак табылган районнан эзли башлыйлар да инде.     

Якындагы кибетнең видеокамерасыннан ике кызның кибеттән нәрсәдер алуын күреп алганнар. Аларның берсе Соня булган. Аннары алар бер хатын-кыз белән каядыр киткәннәр. Видеоязманы волонтерларга күрсәткәч, аларның берсе Соня белән үз кызы булуын күреп ала. Волонтер тизрәк кызы янына кайтып, аңардан бу хәл турында сораша. Соня үз кулы белән дәфтәр битенә Вологда халкын чүп-чарны урамга ташламаска чакырган листовкалар ясаган. Икәүләшеп шул листовкаларны таратып йөргәннәр. Урамда бер хатын очрап, аларны мактаган. Кафега алып барып ашаткан, кибеткә кереп тәм-томнар алгач, хатын-кыз аларны өенә алып кайтып китә. Соңыннан кызларның берсен өенә кайтарып җибәргән, ә икенчесен үтергән.   

Волонтерның 7 яшьлек кызы биш катлы йортның 10 нчы фатирына керүләрен истә калдырган. Тәрәзәдән кран һәм төзелеш күренеп торуын да сөйләгән.  
Полиция бу фатирны табып ала. Күршеләре дә фатир хуҗасының сәеррәк булуын сөйли. Аны ана хокукыннан мәхрүм иткәннәр икән. Полициягә ишекне беркем дә ачмый. Ватып кергәч, Соняның гәүдәсен табып алалар. Ә үтерүче хатын төнлә поездга утырып Мурманскига китеп барган була. Юлда барганда хәле начарая һәм аны Беломорскидагы хастаханәгә салалар. Соңыннан Вологдага озаталар. Ул кызны үтерүен таный.     

40 яшьлек хатынның ике баласы бар, алар туганнарында яши, чөнки әниләрен ана хокукыннан мәхрүм иткәннәр. Аның чит балаларны күзәтеп һәм аларны үзенә чакырып йөргәнлеген башка кешеләр дә сөйләгән. Соняны исә тәмле әйберләргә кызыктырып алып киткән, шуның өстенә кызның өс-башыннан имин булмаган гаиләдән икәнлеге күренгән.

Кызның әнисе социаль челтәрдә актив булган. Кызы югалгач та, күрүче булса, кызын китереп бирүләрен сорап пост язган. Аның балигъ булмаган улы да бар, аны хастаханәгә салганнар. Әни кешене ана хокукыннан мәхрүм итәргә җыеналар.

Үтерүчене кулга алганнар. Аны өч ел элек әнисен кыйнаган өчен биш мең сумга штрафка тарткан булганнар инде.