«Ашлык бар, ә бәясе түбән»: Миңнеханов Путин белән очрашуда нинди мәсьәлә күтәрде?

Татарстан Рәисе Рөстәм Миңнеханов Россия Президенты Владимир Путин белән очрашуда ашлыкка сатып алу бәяләренең түбән булу мәсьәләсен күтәрде. Бу хакта Кремльнең матбугат хезмәте хәбәр итә.

Очрашу барышында Миңнеханов Татарстанда урып-җыю кампаниясенең яхшы узуын һәм уңышның нормаль булуын билгеләп үтте. Әмма ашлык бәяләренең түбән булуы борчу тудыруын әйтте.

— Урып-җыю буенча барысы да яхшы, уңыш нормаль. Әмма ашлык бәяләренә бәйле сорау бар, чөнки логистика чикләнгән. Ашлыкның бәясе әлегә түбән. Әлбәттә, бу борчый, — диде Татарстан Рәисе.