Белгечләр комлык баланың сәламәтлегенә зыян китерә ала, ди

Бу хакта Газета.ру сайты хәбәр итә. 

Күп балалар комлыкта уйнарга ярата, һәм бала үсеше күзлегеннән караганда — бу шактый файдалы ял итү. Әмма ата-аналарга мондый уеннарның бала сәламәтлеге өчен куркыныч тудыра алуын белергә кирәк. 

Табиб сүзләренчә, балалар ком аша эчәк инфекцияләре йоктырырга мөмкин. Болар барысы да комлыкка нигездә хайваннар һәм кошлар фекалиясе, ягъни тизәге аша эләгә.

Шулай ук комлыклар еш кына гельминт — аскаридлар, острицалар, токсокарлар белән зарарлану чыганагына әверелә. Инфекция эт, мәче һ.б. тизәге белән пычранган комда уйнаганда йогарга мөмкин.

Моннан тыш, комда лишай кебек тире авыруларын китереп чыгаручы гөмбәләр (дерматофитлар) яшәргә мөмкин.

"Тагын бер куркыныч — протозой инфекцияләре, аерым алганда токсоплазмоз һәм лямблиоз. Алар пычранган ком аша тапшырыла һәм температура, лимфа төеннәренең зураюы, корсак авыртуы, аллергик реакцияләр белән чагылырга мөмкин», — дип өстәгән белгеч.

Ләкин, педиатр уртаклашканча, инфекция йоктыру куркынычын гади кагыйдәләрне үтәгәндә сизелерлек киметергә мөмкин: комны даими рәвештә яңартырга һәм мәйданчыкны чистартырга; хайваннарның комлыкка керүен чикләргә; баланың кулларының чисталыгын күзәтергә; балаларны комны авызына алдыртмаска һәм уен вакытында битенә кагылмаска өйрәтергә.

"Вакытында профилактик тикшерүләр узу һәм вакцинация календаре буенча эш итү бик мөһим. Ә теләсә нинди борчулы симптомнар булганда табибка мөрәҗәгать итү-бу мөмкин булган инфекцияләрне вакытында ачыкларга һәм дәвалауны башларга ярдәм итәчәк", - дип йомгаклады педиатр.