Метеоролог планетага иң эссе елларның берсе киләчәк дип фаразлаган

Быелгы ел планетада иң эссе өчлеккә керергә мөмкин, әмма бу Россиядә аеруча эссе җәй булачак дигәнне аңлатмый, дип белдергән Россия Гидрометүзәгенең фәнни җитәкчесе Роман Вильфанд. Бу хакта ул «Лента.ру» басмасына сөйләгән.

«Чыннан да, быелгы ел иң эссе бишлеккә керәчәк, бәлки, өчлеккә дә керәчәк, дип әйтергә мөмкин, әмма сүз глобаль җылыну турында бара. Монда башка факторлар роль уйный, әмма районнар буенча детальләштерү мөмкин түгел. Әле безнең ил территориясендә бик эссе булачак, әле Европа, бәлки Себер, бәлки Төньяк Америка территориясендә, ләкин бу бөтен җирдә дә глобаль температура бик югары булырга мөмкин дигән сүз түгел»,-дигән Вильфанд.

Җылы кыштан соң эссе җәй турындагы сорауга җавап биреп, ул җәйнең һәм кышның температура режимнары арасында нинди дә булса сизелерлек статистик бәйләнеш булмавын аңлаткан.

«Кырыс кыштан соң бик эссе җәй, эссе җәйдән соң — бик салкын кыш килә дип фикерләүчеләр дә бар. Әмма метеорологлар тарафыннан күп тапкырлар үткәрелгән статистик анализ моны бөтенләй расламый», - дигән метеоролог.