Мирсәет Сөнгатуллинның бер дискын тыңларга 14 сәгать кирәк!

Шушы араларда ул әнә шул халкыбыз җәүһәрләреннән торган торган диск чыгарды. Анда барысы 205 җыр һәм мөнәҗәт кергән. Ул аларны туплауга 2012 елда тотынган. Зур хезмәт куелган әлеге дискны бертуктаусыз тыңласаң, ундүрт сәгать вакыт кирәк булыр иде. Татар халык җырлары ул безнең үткәнебез, әби - бабаларыбызның моңлы ядкәре. Аларда халкыбызның аянычлы язмышы да, яшьләрнең саф, керсез мәхәббәте дә, аерылу газаплары да чагыла.
Татар халык җырларын башкарып караучылар күп. Ләкин килеп чыкмый. Аларны йөрәгең аша үткәреп җырларга кирәк. Татар халык җырлары челтерәп аккан чишмәләрне хәтерләтә, дип сөйли өлкәннәр, Мирсәет Сөнгатуллинны тыңлаганда.

Әлеге диск өлкәннәргә генә түгел, яшь буын өчен дә кирәк. Ул халык җырлары энциклопедиясен хәтерләтә. Җырчының бу зур хезмәте бәяләнергә хаклы. Аңа әлеге дискны чыгаруда ярдәм кулы сузучылар да табылган. Моңа кадәр ул унбиш рус халык җырыннан торган диск чыгарды. Тагын 50 гә якын онытылган халык җырларын тупларга өлгергән. Әмма аларны яздыру, чыгару зур чыгымнар сорый. Бүген бер җырны яздыру 10-15 меңгә төшә. Узган ел аның эстрада җырларыннан торган "Йөрәк моңы" дигән дискы да дөнья күргән иде. Анда улы Алмаз башкаруындагы җырлар да кергән. Алмаз Сөнгатуллин бүгенге көндә Мәскәү опера театрында эшли. Быел аспирантура тәмамлый.
Мирсәет Сөнгатуллин киләчәктә 200 эстрада җырын туплап чыгарырга хыяллана.