#Мәдәният 07 марта 2013, 07:34

Парлы гомер, җырлы язмыш

07 марта 2013, 07:34

Халкыбызның танылган җырчысы, Татарстанның атказанган артисты Рабига Сибгатуллина белән Татарстанның атказанган сәнгать эшлеклесе Фәрит Хатыйповның иҗат кичәсе әнә шулай дип аталган иде. 500ләп шигырьгә канат куйган, дүрт җыентык авторы булган күренекле композитор ул кичне үзенең иҗат җимешләрен тамашачы хозурына тәкъдим итте.

Скопировать ссылку

Заманында Таһир Якупов, Хәйдәр Бигичев һ.б. җырчылар тарафыннан башкарылган җырлары да экраннарда күрсәтелеп хәтердә яңарды. 40 ел буе Фәрит абый белән кулга-кул тотынышып янәшә атлаган Рабига апа үзенең моңнары белән ул кичне тагын бер кат тамашачыны сөендерде. Татарстанның халык артистлары Рафаэль Сәхабиев, Флюра Сөләйманова, Гөлзадә Сафиуллина, Миңгол Галиев һәм башка күп кенә җырчылар репертуарыннан төшми Ф.Хатыйпов җырлары, чөнки аларны халык яратып тыңлый. Шуңа күрә композиторның күптән язылган җырларына да җан өрә җырчылар. Татарстанның атказанган артистлары Филүс Каһиров, Рөстәм Асаев, Бәширә Насыйрова, Татарстанның халык артисты Зөфәр Харисов тарафыннан яңгыраганнары әнә шундыйлардан иде. Татарстанның халык артисты Фердинанд Сәлахов: «Мин Фәритнең ундүрт җырын башкардым. Саф татарча, андый җырларны тудыру җиңел түгел. Фәрит Хатыйповка Г.Тукай исемендәге Дәүләт бүләген бирергә кирәк. Ул дөньяның төрле почмакларына барып сәнгатебезне пропагандалады. Аның иҗаты кыйммәтле асылташлар сыман», - дигән сүзләрен җиткерде. Ф. Хатыйпов белән Р.Сибгатуллинаны Теләче һәм Арчадан килгән якташлары да тәбрикләде. Рабига апа белән Мәскәүдәге студиядә белем алган бер төркем курсташлары да аларны туган көннәре белән котларга килгән иде. Җыр бәйрәмен КФУ профессоры Фуат Галимуллин һәм Татарстанның халык артисты Рәшит Сабиров алып барды.

Кызыклы яңалыкларны күзәтеп бару өчен Телеграм-каналга кушылыгыз.

#250