Халык, әйдәгез, Казансуны чистартабыз!

Россиядә “Экология” илкүләм проекты кысаларында “Иделне сәламәтләндерү”, “Үзенчәлекле сулыкларны саклау” федераль проектлары гамәлгә ашырыла.

– Казансу елгасы Казан, гомумән, республика өчен әһәмиятле сулык. Ул аеруча саклаулы территория булып санала. Тавыш бирү барышында да халык Казансу елгасына өстенлек бирде. Республикадагы сулыкларны, шул исәптән, Казансуны тернәкләндерүгә Татарстан Рәисе Рөстәм Миңнеханов зур теләктәшлек күрсәтә, бюджетта финанс ярдәме каралган. Казансуны чистартуга 2023 елда керешелде. Елга буйлап урнашкан агросәнәгать предприятиеләрендә чистарту корылмалары төзү мәсьәләләре дә чишелеш таба бара, – диде республиканың экология һәм табигый чыганаклар министры урынбасары Ольга Манидичева “Татар-информ” мәгълүмат агентлыгында үткәрелгән матбугат конференциясендә.

Россия География җәмгыятенең Татарстан бүлеге рәисе Дмитрий Шиллер сөйләгәнчә, 2021-2022 елларда Казансу елгасының халәте, аны пычратучы чыганаклар өйрәнелгән.
– “Ирекле агым” проекты кысаларында Казансу елгасы ауган агачлардан, төзелеш һәм көнкүреш калдыкларыннан чистартылды. Пластик савытлар гына да елгадан һәм яр буйларыннан 800 капчык җыеп алынды. Табигать рельефы елганы техника белән чистарту мөмкинлеге бирми, шунлыктан эшләр кулдан башкарыла. Өмәләрдә катнашучы экоактивистларга, битараф булмаган кешеләргә рәхмәт! Казансуны чистартуның 3нче этабы башланды. Өмәләрдә катнашырга теләге булган халык Россия География җәмгыятенең Татарстан бүлегенә мөрәҗәгать итсен, – диде Дмитрий Шиллер.

Татарстанның биология  чыганаклары буенча дәүләт комитетының тереклек һәм үсемлек дөньясын саклау идарәсе җитәкчесе Ринат Чиспияков әйткәнчә, 142 чакрым озынлыктагы Казансу елгасында “Кызыл китап”ка кертелгән тереклек һәм үсемлек төрләре бар. 
Биектау районының Урманчы бистәсендә 5 июльдә 10.00 сәгатьтә “Экойөзү” үткәрелә. Табигать сөючеләр көймәләрдә Казансу буенча Казанга кадәр төшә.