“Панорама” фестивале милләтләрне тоташтыра

Өстәвенә, быел Татарстанда Туган телләр һәм халыклар бердәмлеге елы дип игълан ителгән иде.

Ана теле көне кысаларында, республиканың Мәгариф һәм фән министрлыгы белән Мәдәният министрлыклары 30дан артык чара уздырырга ниятли. Шул проектларның берсе – “Панорама” фестивале. Ул Татарстан тарихында тәүге тапкыр үткәреләчәк. Шуны да билгеләп үтәргә кирәк, безнең төбәктә яши торган 170тән артык милләт вәкиленең кинолары белән бер көн, хәтта бер ай эчендә генә түгел, ә ел дәвамында танышырга мөмкин булачак. Чөнки фестиваль 12 декабрьдә – Россия Конституциясе көненә кадәр дәвам итә.

Татарстан Халыклар дуслыгы йорты директоры Ирек Шәрипов сүзләренчә, теләсә нинди проектның уңышы аның озак вакытлар дәвам итүе һәм һәр муниципаль районга барып җитүеннән гыйбарәт. Фестивальнең форматы хакында уйлаганда да нәкъ менә шул үзенчәлекләр истә тотып эшләнелгән. Төгәлрәк әйткәндә, фестиваль программасы белән Казанда гына түгел, ә районнарда да танышырга мөмкин булачак. Алай гына да түгел, фестивальне халыкара дәрәҗәдә дип атарга мөмкин. Чөнки июнь башында халыкара телләрне саклауга багышланган конференция узачак. Анда Үзбәкстан, Кыргызстан, Казахстан вәкилләренең дә катнашуы көтелә.

Проектны тормышка ашыручыларның берсе, “Татаркино” оешмасы җитәкчесе Миләүшә Айтуганова сүзләренчә, фестиваль чуваш киносы көннәре белән башланып китәчәк. Әлеге милләт вәкилләре күпләп яши торган районнар — Нурлат, Тәтеш, Аксубай, Чүпрәледә дә фестиваль програмасы белән танышырга була. Фестивальдә катнашу өчен Чувашиядән махсус делегация чакырулы. Сүз уңаеннан, декабрь аенда гына Чувашия Республикасында безнекеләр кунак булып, Татарстан киносы көннәре үткәргән иде. Күршедә яшәүче татарлар Татарстанда төшерелгән милли киноларны бик яратып кабул иткән.

Программаны төзегәндә оештыручылар көннәрне һавадан гына алып куймаган. Һәр халыкның үзенә генә хас милли бәйрәме мөһим даталары бар. Фестиваль программасы да шуларга яраклаштырылып эшләнелгән, дип аңлатты “Татаркино” директоры.
– Кешеләр үзләренең тамырларына тартыла. Татарстанда яши торган барлык милләтләр арасында да үзләренең ватандашлары белән бәйли торган күпер барлыкка килсен иде, – дип теләкләрен дә җиткерде Миләүшә Айтуганова.

Лилия ЛОКМАНОВА.