Эшкуарлар белән эшли белсәң, “аш пешә”

Татарстан Республикасының Иҗтимагый палатасы белән Татарстанның кече һәм урта предприятиеләре ассоциациясе “Татарстан Республикасы муниципаль берәмлекләрендәге эшкуарларның иң яхшы иҗтимагый (координация) советы” дигән конкурс үткәрә.

– Бәйге алтынчы мәртәбә оештырыла. Кече һәм урта предприятиеләр махсус хәрби операциядә катнашучыларга ярдәм, хәйриячелек, авылларда яңа эш урыннары булдыру, инновация, туристлык, чит ил товарларына алмаш барлыкка китерү, сәнәгать паркларын үстерү, көнкүреш калдыкларын эшкәртү юнәлешләрендәге эшчәнлекләрен күрсәтә, – диде Ассоциация советы рәисе Фәрид Сафин “Татар-информ” мәгълүмат агентлыгында уздырылган матбугат конференциясендә.

Конкурста узган ел Яшел Үзән муниципаль берәмлеге беренче урынны яулаган. Быелгы бәйгенең финалы 23 майда Яшел Үзән шәһәрендә үткәрелә.

– Мари Эль, Чувашия, Башкортстан вәкилләре дә чакырулы. Эшкуарлыкта аларның да уңышлы алымнары бар, тәҗрибә уртаклашу һәм аралашу һәркем өчен дә файдага, – диде Ассоциация советы рәисе урынбасары Вәсим Вахитов.

Татарстанның беренче Президенты Минтимер Шәймиев белән Татарстан Рәисе Рөстәм Миңнехановның кече һәм урта предприятиеләргә теләктәшлек күрсәтүләрен, хакимият органнарын эшкуарлар белән эшләргә чакырып торуларын телгә алды Ассоциациянең 1нче вице-президенты Роберт Закиров.

– Яшел Үзәндә 21 майда Җиңүнең 80 еллыгына багышланган велойөреш була. Мари Эль Республикасы эшкуарлары да килә. Велойөреш Яшел Үзәннән старт ала һәм Волжск шәһәрендә тәмамлана. Ике шәһәрнең дә Җиңү паркларында митинглар үткәрелә, һәйкәлләргә чәчәкләр салына. Махсус хәрби операциядә катнашучылар чакырулы, – диде Роберт Закиров.