“Миңа чәчәк исе ошый...”: җырчыларның яраткан чәчәкләрен барлыйбыз!

Алар өчен чәчәк бирү яки кабул итеп алу гадәти күренешме? Үзләре нинди чәчәкләр ярата? Барысын да белештек, әлеге язмада җаваплары белән таныша аласыз!

 “Чәчәк бирүне акча туздыру дип санасам да, матур бәйләмнәрне хатыныма бүләк итәргә туры килә, чөнки кызыбыз чәчәк сорый. Үзенә генә түгел, әнисенә дә бүләк итүләрен тели, ә мин каршы килмим”, - дип елмая Миндияр Шәймарданов. Ә җырчының яраткан һәм танып белгән бердән-бер чәчәге ул – гөлчәчәк, ягъни розалар булып чыкты. “Хатыным аларны бик ярата”,– ди ул.

Америкада яшәп, иҗат итүче ватандашыбыз Лилиана Газизова чәчәкләрне бүләк итәргә дә, кабул итеп алырга да бик ярата. “Чәчәкләр минем өчен – яхшы кәеф тудыручы бер тылсым ул. Лалә, чалмабаш, лилияләрне бик яратам”,– ди җырчы. “Монда Нью-Йоркта да, Казан урамнарындагы сыман чәчәкләр бик күп һәм шундый матурлар. Егетләр, яраткан хатын-кызларыгызны сәбәпсез чәчәк бәйләмнәре белән сөендереп торыгыз. Нәкъ менә кечкенә игътибар чаткысы безнең күңелләрдә мәхәббәт очкынын көчәйтә”,– дип тә өсти Лилиана.

“Элек концертларда бирелгән чәчәкләргә артык исем китми иде. Матур чәчәк бәйләмнәрен йә вахтер апаларга, йә сакчыларга тапшырып калдырдым, артык бәхет китерми иде алар миңа”,– дип шаккатырды Алсу Абульханова. Әмма хәзер барысы да башкача! Җырчының чәчәкләргә карашы үзгәргән. “Бүләк ителгән чәчәкләргә гашыйкмын, бик яратам андый сюрпризларны. Элек гөлләргә исем китсә, хәзер алай түгел. Бакчада розалар үстерәсем килә. Үз йортыбыз белән торгач, урамда матурлык тудыру теләге артты. Ә тузганакларны яратмыйм, алар белән без ныклап көрәшәбез”,– дип шаярта Алсу.

“Чәчәк бирү ул – эмоцияләр, матур хис-кичерешләр бүләк итү”,– дип сүз башлады Рәфис Кәлимуллин. “Хатын-кызларга сәбәпсез дә чәчәкләр биреп торырга кирәк дип саныйм, мәхәббәт очкыннарын кабызып тору өчен. Мин кыр чәчәкләрен яратам. Үземә дә бүләк иткәннәре бар”,– дип ассызыклый Рәфис.

Рөстәм Асадуллин концертларда тамашачыдан чәчәк бәйләмнәрен кабул итеп алырга бик ярата, дуслар. “Ул бит алардан зур буләк! Сайлап алып киләләр, бүләк итәләр. Чәчәкләргә сокланып, аларның хуш исләренә хозурланып йөрим мин гел. Миңа чәчәк исе ошый”,– ди хисле җырчыбыз Рөстәм.

“Яшерен-батырын түгел, җенси бүленешкә карамастан, артист кеше үзенә чәчәк бүләк иткәннәрен бик ярата”, - ди Раяз Фасыйхов. “Чәчәкләрне үзем әллә ни еш бүләк итәм дип әйтмәс идем. Күбесенчә бүләкләрдә бирәм зур букетларны”,– ди җырчы. Раяз май аен ир-атлар өчен идеаль ай икәнен дә ассызыклый: “Шомырт, сирень чәчәкләрен бүләк итәргә мөмкин, акча кесәдә кала”,– ди ул.

Зәринә Асылкаева чәчәкләрне бик ярата, бигрәк тә аларның күп булуын. “Кызыл гөлчәчәк, ягъни розаларга, пион, ягъни чалмабашларга үлеп гашыйкмын. Чәчәк бүләк итү – минем өчен гадәти күренеш, менә бүләк итмәсәләр, кызлар, бу инде кызыл әләм,"– дип көлә Зәринә.