Рифат Зарипов: “Мин дөрес эшләмим, ахры”, - дип уйладым.

- Концертларны туктаттыгызмы әллә?

- Әлегә ял итәбез. Уразадан соң 10-15ләп концерт бар.

- Рамазан аенда концерт куймыйсыз, димәк?

- Әйе, бу минем карарым. Шул сәгать 7ләрдә азан әйтәләр, намазга чакыралар, ә без радио-телевидениедән концертка килегез дип әйтикме? Бер елны Рамазан ае башланган гына вакыт иде, Казанда концертлар туры килде. Үземә шундый уңайсыз иде. “Мин дөрес эшләмим, ахры”, - дип уйладым. Быел Чиләбе, Екатеринбург, Төмән якларында концертларны гына калдырдым. Бу алдан билгеләнгән көннәр, алардан баш тартып, күчереп булмый. Мин үзем генә түгел, төркемем дә бар бит. Аларга да тормышларын җайларга кирәк. Нәрсә дисәк тә, акчасыз гына яшәп булмый.

- Сез уразадамы?

- Дүрт-биш еллап тотам. Аның белән мактанырга кирәкми, бу һәр мөселман кешесенең бурычы. Туганнар, әти-әниләр дә уразада. Тоткан уразаларыбыз кабул булсын!

- Россия төбәкләре буенча да концертлар куясыз. Тамашачы аерыламы?

- Миңа калса аны аерып булмый. Казанда 6 көн концерт куясың, алтысы алты төрле үтә. Артист та гел бертөрле була алмый. Кайвакыт кычкырып җырлыйсы, кайвакыт елыйсы килә. Без һава торышы кебек, күз дә тия, энергия дә бетә.

- Тамашачылар сезне гадәти тормышта да бик шаян кеше дип уйлыйдыр?

- “Синең хатыныңа рәхәт инде, гел көлешеп яшисездер”, - диләр. Бу сүзләрне Диләрәгә күрсәтәм дә: “Яшәп карасыннар алар синең белән”, - ди (көлә). Сәхнәдә кешеләргә яхшы кәеф, җылылык өләшергә тырышам. Берничә сәгатькә булса да, дөнья мәшәкатьләреннән ял иттерәсе килә. Тормыш болай да баса ул, кредит, хезмәт хакы аз, салымнар. Кеше концертка килеп бераз ял итеп кайтса, шуңа шат. Ә тормышта, дөрестән дә, мин җитди кеше.

- Сәхнәдәге образны чынбарлык итеп кабул итүчеләр дә күп бит.

 - Без барыбыз да гап-гади кешеләр. Үзеңне тамашачыдан өстен дә, түбән дә куярга ярамый. Бөтенебез дә Аллаһы Тәгаләнең колы. Һәрберебезнең үз һөнәре, шул гына.

Фото: https://vk.com/rifat_zaripov_new