Римма Никитина татар эстрадасыннан китә?

Халык арасында шул арада сорау туды: әллә Римма Никитина татар эстрадасыннан китәргә уйлаганмы? Гомумән, ни өчен рус теленә таба юнәлеш алган. Бу хакта җырчының үзеннән сораштык.

—    Римма, кызык бит әле бу, ни рәвешле шушы җырың иҗат ителде?

—    Бу җыр Мәскәүдәге “Домодедово” аэропортында утырганда башымда туды. Ул вакытта башкаладагы егетем белән аерылышкан идек. Шуннан соң килеп туган уйлар һәм хис-кичерешләр сүзләрен дә, көен дә “әзерләп” бирде. Казанга кайткач, аны яздырырга уйладым. Җыры шәп, күңелгә керә торган, шуңа күрә дә аның клибы да булырга тиеш дигән фикергә килдем. Ул да сыйфатлы һәм эчтәлекле килеп чыкты, кинолардан бер дә ким түгел. Күп кенә хатын-кызлар минеке шикелле вакыйгалар аша кичкән, әлеге композиция аларның рәсми булмаган гимнына әверелергә мөмкин, чөнки җыр тормыштан алынган.

—    Ә ни өчен рус телендә иҗат ителде бу җыр? Татар эстрадасыннан китәргә телисеңме әллә?

—    Русча җырларым болай да бар бит. Әйтик, “Мои хорошие, зажжем” дигәне бик популарлашып китте. Мин аларның һәрберсен яратып, бөтен күңелемне биреп башкарам. Ә татар эстрадасына килгәндә, иҗатымны дәвам итәм, әле эшлисе эшләрем бик күп.

Шунысын да әйтергә кирәк, әлеге “Даже не думай” дигән җырның клибында “Шәһри Казан” журналисты Рәсим Хаҗиев та катнашты. Ул анда законсыз рәвештә “идән асты” сугышлары оештыручы эшмәкәр ролендә уйнаган. Үзе әйтүенчә, клипта катнашырга аны режиссер Айдар Шәймәрдановның һәрвакыт креатив һәм заманча сценарий буенча гына эшләве, шулай ук Римма Никитинаның гел яңалык эзләве, креатив булуы һәм үҗәтлеге этәргән.