Рәнис Габбазов: "Артист өчен үз йортың белән яшәү яхшырак"

- Рәнис, нинди яңалыклар бар?

- Ике җыр яздырам. Берсе – дәртле, икенчесе салмак булачак.

- Быел чит илгә бардыгызмы?

- Әлегә улыбыз Тимерлан кечкенә. Октябрьдә 3 яшь тулачак, Аллаһ теләсә. Шуңа күрә чит илгә сәяхәтебез киләсе елга булыр дип уйлыйм. Алай да үзем Кыргызстанга Сабан туена барып җырлап кайттым. Җәй көне Ульяновск белән Казан арасында йөрдек. Әти-әниләргә булыштык.

- Рәнис, син йорт салып йөри идең бугай...

- Әйе, Казан янында йорт салдык. Шунда яшибез. Үз йортыңда яшәү бик рәхәт. Бигрәк тә артист өчен. Мин бит төнлә җырлый башлыйм. Иртәнгә кадәр җырлыйм. Репетиция ясыйм. Ә фатирда күршеләр белән алай җырлап булмый...

- Хатының Гөлия дә җырчы. Ни өчен сәхнәгә чыкмый ул?

- Халык бик сорый инде. Вакыты җиткәч, чыгар. Сәхнәгә чыгарга беркайчан да соң түгел. Иң мөһиме – яхшы репертуар белән чыгарга кирәк. Гөлия театр сәнгате кафедрасында укыды. Бик сәләтле артист. Хәтта пародияләр күрсәтә.

- Дуэт булып җырларга теләмисезме?

- Андый уй бар. Ләкин хәзер эстрадада дуэтлар күп. Көндәшлек көчле. 

- Гөлия көнче түгелме?

- Юк. Безнең һөнәрдә ышаныч булырга тиеш. Без бер-беребезгә ышанабыз. Эстрада артистлары арасында төрле гайбәтләр булырга мөмкин. Юк-бар сүзләргә ышанмаска дип алдан ук сөйләшеп куйдык. Әлбәттә, гастрольләрдә телефонны озаграк алмый торсам, борчыладыр инде...

- Тимерланга иптәш алып кайтырга уйламыйсызмы?

- Хәзер үк түгел, әмма планда бар.