#Социаль тормыш 01 июня 2022, 16:44

Балаларга уен мәйданчыгы да булдырыла

01 июня 2022, 16:44

Россиядә “Торак һәм шәһәр мохите” илкүләм проекты нигезендә, 2023 елгы төзекләндерү планын формалаштыруда халык та катнашты. Татарстанда 170 мең кеше төзекләндерүгә мохтаҗ паркларга, шулай ук ишегалларына дәүләт һәм муниципаль хезмәт күрсәтүләр порталы аша тавыш биргән. Казанда-35 мең, Чаллыда 11 мең кеше активлык күрсәткән. Тавыш бирүләр ярдәмендә, киләсе елгы планга Казаннан-65, ә Чаллыдан 18 ишегалды узган.

Скопировать ссылку

Казанның Чистай урамында ишегалдын төзекләндерү барышын карап кайттык

“Каздорстрой” җаваплылыгы чикләнгән җәмгыять эшчеләре Чистай урамындагы ишегалдын төзекләндерү белән мәшгуль бүгеннәрдә.
— Эш фронты Чистай урамындагы 3 нче белән Ибраһимов проспектындагы 89 нчы йортларны колачлый, чөнки аларның ишегаллары уртак. Биредә иске юл катламын кырдырып алдык, яңа таш түшәдек, ахырда асфальт җәеләчәк. Тротуарларның яртысына асфальт түшәлде инде. Ишегалдына утлар куела, балалар уен мәйданчыгы өчен дә җирлек әзерләп калдырабыз. Мондагы эшләрне ике атнада тәмамлап, Авиатөзелеш районына күченәчәкбез, анда “Жилплощадка”да ишегалдын яңартачакбыз,-дип таныштырды участок мастеры Сергей Романчев.

Татарстан Президенты Рөстәм Миңнеханов башлангычындагы “Безнең ишегалды” республика программасы ярдәмендә быел Казанда 466 йорт ишегалды комплекслы төзекләндерелә. Ишегалларын төзекләндерергә керешү кирәклеге турында беренче булып мәсьәләне “Бердәм Россия” партиясенең Татарстан төбәк бүлеге күтәреп чыккан булган. Татарстан Президенты бу тәкъдимне хуплаган.

“Безнең ишегалды” программасы кысаларында 6 мең 923 ишегалдын төзекләндерү бурычы тора, шул исәптән Казанда 3 меңнән артык ишегалды яңартылачак. Татарстанда барлыгы 9,6 мең ишегалды исәпләнә, аларның 2,7 меңе төзек хәлдә.

Автор фотолары