Коронавирус кына җитмәгән, янып та үлмик инде

– Республикада 2016 елдан башлап 251 мең йортка һәм фатирга автомат янгын хәбәр бирүче аппарат урнаштырылды. Татарстан Президенты шундый аппаратларны социаль яктан мохтаҗ гаиләләргә урнаштыру өчен 41 миллион сум бирде. Быел гына 85 мең аппарат куелды. Файдасы зур, 116 кеше исән калды – алар җайланма тавышын ишетеп, урамга чыгып котылганнар. Кызганыч, кайбер кешеләр битарафлык күрсәтә һәм фаҗига корбанына әверелә, – диде Рафис Хәбибуллин.
Мәсәлән, 23 декабрьдә Зәй районының Савельево авылындагы янгында йорт хуҗасы янып үлгән. Бу ир-ат тәмәкене өй эчендә генә тарткан, “чыелдамасын” дип, аппаратның батарейкаларын алган куйган икән.

Байлар Сабасында 27 декабрьдәге янгында шулай ук йорт хуҗасының гомере өзелгән. Аның йортына сигнал аппараты урнаштырылган булган. Министр Рафис Хәбибуллин: “Күршеләре аның өендә янгын хәбәре аппаратын күргәннәре булмаган. Спиртлы эчемлекләр белән мавыккан ир аппаратны аракы өчен сатып җибәргән, күрәсең”, – дип фаразлады.

Татарстанда 20 декабрьдән 2021 елның 10 гыйнварына кадәр янгынга каршы үзгә режим бара. МЧС хезмәткәрләре социаль һәм мәдәният учреждениеләрен тикшерә. Лаештагы “Добрые истории” социаль учреждениесендә янгын куркынычсызлыгы буенча 10 кимчелек, Түбән Камадагы шундый ук “Добрые истории” исемендәге учреждениедә – 23, Казандагы “Дубравный” да – 24 һәм “Милена”да 30 кимчелек ачыкланган.
 – Мондый социаль учреждениеләрне ябырга кирәк, югыйсә. Закон буенча без аларны беренче очракта ук хөкемгә тарттыра алмыйбыз. Күршеләребез-Башкортстандагы өлкәннәр интернатында 11 кеше янып үлде. Шундый коточкыч фаҗигаләрдән сабак алырга, таләпләрне катгый үтәргә кирәк, – дип, көрсенде Рафис Хәбибуллин.

Салютларны сәнәгать биналары һәм торак йортларга якын урында аттыру тыела. Янгынга каршы үзгә режим таләпләрен бозган өчен гражданнарга 2 меңнән 4 мең сумга кадәр штраф салына. Юридик затларга 200 меңнән 400 мең сумга кадәр.
 – Яңа ел ялларында күп кешеләр сулыкларга балык тотарга барачак, әлбәттә. Боз өстенә күпләп туплану, теләсә кайда йөрү, машинада боз өстенә керү хәвефле. Республикада 4 урында елга аша боз кичүе ясалды, күзәтүле шушы урыннардан гына чыгу зарур. Кешеләр мунча ягачак, ит кыздырачак, бәйрәм бит. Тик, һәр очракта да мичләрне һәм ачык утны игътибарсыз калдырырга ярамый. Балаларга ут белән уйнарга, салют аттырыга рөхсәт бирә күрмәгез! Яңа ел бәхетләре белән килсен, фаҗига чыгармау үзебездән дә тора, – диде министр Рафис Хәбибуллин.