Әтисе өйдән чыккан, ә баласы янгын эчендә калган

Сабыйларны ялгызларын калдырмагыз

— Казанда 10 декабрьдә Әмирхан урамындагы бер йортта 5 һәм 7 яшьлек ике малай чактан гына янып үлми калды. Әниләре аларны үзләрен генә калдырып, кибеткә киткән. Малайлар газ плитәсендә сөлгегә ут төрткәннәр дә, яна башлаган сөлгене диванга ташлаганнар. Бәхетләренә, әниләре кайтып җитеп, инде җиһазлар янырга керешкән бүлмә ишеген ябып куеп, ярдәм чакырган. Питрәч районында 12 декабрьдә Ленино-Кокушкино авылында чыккан янгын фаҗигалерәк тәмамланды. Әтисе урамга тәмәке тартырга чыккан вакытта өйләре эчендә бер бүлмә янырга керешә. Ир кеше йөгереп кереп, 7 яшьлек улын алдагы бүлмәгә күчерә дә, утны сүндерергә тотына. Ләкин, янгын көчәйгәнлектән, ишегалдына йөгерә, ә бала өй эчендәге бүлмәдә кала. Янгын сүндерүчеләр малайны алып чыга, әлеге бала ДРКБ хастаханәсенә китерелде. Нинди генә очракта да сабыйларны һәм бик олы яшьтәге өлкәннәрне өйдә ялгызларын гына калдырмаска тырышырга кирәк,-дип, күңел тетрәндергеч вакыйгалар сөйләде һәм киңәш бирде Максим Трущин.

Янгын да “каникул” ярата

Яңа ел яллары көннәрендә янгыннар кискен артып китә. Узган елны Яңа елны каршылаган һәм ял иткән көннәрдә 169 янгын очрагында 14 кеше үлгән.

— Кирпеч яки тимер мичләрнең, электр җылыткычларның төзек булуы зарур. Исерек хәлдә ут белән эш итү аеруча куркыныч. Узган кышкы каникулда исерекләр 14 янгын чыгарды, ә шул янгыннарда 10 кеше ут эчендә калып үлде, - дип кисәтте Максим Трущин.

Чыршы бизәү тыелмый

— Быел мәктәпләр, балалар бакчалары залларына чыршылар урнаштырыламы?- дип, “Шәһри Казан” газетасы исеменнән кызыксынып сорау бирдем.

— Моны муниципаль берәмлекләр хәл итә. Безнең тарафтан исә, андый тыю-чикләү юк. Чыршылар бизәгәндә янгын куркынычсызлыгы кагыйдәләре катгый үтәлергә тиеш. Чыршы җылылык торбаларыннан һәм электр розеткаларыннан 0,5 метр читтә урнаштырылсын. Заводта ясалган гирляндалар гына эленсен, аларны төне буена кабызып калдырмагыз. Чыршы ботагына шәм куймагыз, аңа ут кабызмагыз,-диде МЧС вәкиле.

Салют башыңны тишмәсен

Яңа елның бизәге дә һәм хәвефе дә-пиротехник әйберләр. Узган кышның Яңа ел ялларында салютны саксыз аттыру сәбәбендә, 3 янгын чыккан, пиротехник әйберләрдән 2 бала һәм 3 олы кеше зыян күргән. Максим Трущин кисәткәнчә, пиротехник әйберләр кул бармакларын өзәргә, күзсез дә калдырырга мөмкин.

— Кечкенә балаларга пиротехник әйберләр бирмәгез. Гап-гади бенгаль уты да чәчрәп китеп күзгә керә. Салют аттырганда техник таләпләрне үтәгез. Кибетләрдән салют алып кайткач, аларны балалар күзеннән ераккарак яшереп куегыз, чөнки, балалар кызыксынучан, салютны өйдә аттырып, бәла чыгарулары ихтимал. Татарстанда салютлар аттыру өчен 700 мәйданчык билгеләнәчәк. Казанда да алар гадәттәге 4 мәйданчыктан күбрәк булыр быел. Исемлек әзерләнеп беткәч, ул МЧС сайтына урнаштырылачак,- диде Максим Трущин.

Ходай сакланганны саклый

Янгын турында автоном хәбәр бирү аппараты быел 70 кешегә ут-күздән котылып калырга ярдәм иткән.

— Республикада 4 һәм аннан күбрәк балалары булган гаиләләр, ветераннар, инвалидлар яшәгән өйләргә һәм фатирларга Татарстан Президенты ярдәмендә янгын хәбәре аппаратлары бушлай урнаштырыла. Мондый аппаратлар тагын сатып алынды, алар декабрь ае дәвамында әлеге категория гражданнар торакларына куела,-диде Максим Трущин.

Катгый режим башлана

Татарстан Хөкүмәтенең 8 декабрьдәге карары нигезендә, республикада 2021 елның 20 декабреннән 2022 елның 9 гыйнварына кадәр янгынга каршы үзгә режим кертелә.

МЧС һәм полиция хезмәткәрләре янгын куркынычсызлыгы кагыйдәләренең үтәлешен тикшереп рейдлар оештырачак. Таләпләрне бозган очракларда гражданнарга 2-4 мең сум, вазифа биләгән затларга 15-30 мең сум, ә юридик затларга 200-400 мең сум штраф яный.

Куен дәфтәренә:

- кулдан ясалган электр җиһазларыннан файдаланмагыз;

- бер розеткага берничә электр приборы тоташтырмагыз, чөнки, розеткага артык көчәнеш килеп, ут кабыначак;

- кечкенә балаларга шырпы яки кабызгычлар бирмәгез, ут янында ялгызларын гына калдырмагыз;

- салютларны өйләр һәм биналар яныннан 30 метр читтә, ә сәнәгать һәм энергетика корылмалары яныннан 500 метр читтә генә аттырыгыз;

- салют кабызып җибәргәннән соң атмаса, 5-10 минут узмыйча янына бармагыз, салютны сүтеп тикшермәгез.

Янгын очрагы турында 101 яки 112 телефоннары аша хәбәр бирегез.