Казанның “Зенит” волейбол командасы букмекерлык белән мавыгучыларны авыр хәлгә куйды. Алдагы елларда сезон дәвамында диярлек җиңелүсез уйнаган команда түбәнгә тәгәри.
23 гыйнварда Казанның “Зенит” волейбол командасы Санкт-Петербургта адашларына оттырды (1:3).
– Бүген без “Динамо” белән очрашуга караганда (1:3 һәм 0:3 – авт.) яхшырак уйнадык. Әмма нәтиҗә юк. Нәтиҗә кирәк. Яхшы яисә начар уйнарга була, әмма нәтиҗәгә ирешмәү борчуга сала, – диде баш тренер Владимир Алекно. – Әкренгә алга барырга кирәк. Әлегә бу командалар көчле. Кем азрак ялгыша, шул җиңә. Мондый ялгышлар белән җиңүгә өмет итеп булмый.
Бу “Зенит”ның рәттән дүртенче оттыруы булды. Казан волейболчылары соңгы 8 матчның 7сендә җиңелде. Шулай итеп, 20 уенның 7сендә җиңелү ачысы татыган “Зенит” Россия чемпионатында 4нче урынга тәгәрәде.
– Безнең хәзер төп проблема – үзебезгә ышаныч юк. Вакыт-вакыт сыйфатлы уен, үз холкыбызны күрсәтсәк тә, – ди бу уңайдан команда капитаны Александр Бутько. – Безгә имгәнүләр дә аяк чала. Тулы составта җыелып булмый. Сүз дә юк, акланырга кирәкми. Плей-оффка яхшы әзерлектә килү өчен хәлне үзгәртергә тырышачакбыз.
...Плей-офф димәктән, “Зенит”ка быел “Алтылык финалы”на турыдан-туры юллама турында хыялланырга гына калды инде. Анысын даими чемпионат нәтиҗәсе буенча 1-2нче урындагы командаларга бирелә. Калган дүрт юллама өчен 8 команда көрәшәчәк.
30 гыйнварда “Зенит” кунакта үкчәсенә басып килүче (19 уен – 7 җиңелү) “Факел” командасы белән очраша. 5нче урынга ук тәгәрәмәс өчен инде җиңелергә ярамый.
Фото: http://zenit-kazan.com
Иң мөһим һәм кызыклы язмаларны Татмедиа Telegram-каналында укыгыз
