"Яшә, дустым, хәзер яшә" Хай-дайвинг буенча Россия чемпионы коточкыч юл һәлакәтендә үлде

12 гыйнварда Россиянең уникаль спортчысының гомере өзелә.

23 яшенә Ләйлә Сәламова безнең спорт тарихына кереп өлгерде. Ул суга синхрон сикерү буенча Россия чемпионатында көмеш медаль яулап кына калмады, хай-дайвинг буенча дөнья чемпионатына сайлап алынган һәм клифф-дайвинг буенча дөнья сериясенә уайлд-кард алган беренче россияле булды, дип яза «Чемпионат.ру» сайты.

Яшь кыз дөньяны берничә тапкыр гаҗәпләндерергә тиеш иде. Тик өлгерә алмады. Спортчы Ләйлә Сәламова юл фаҗигасендә үлде.

«Тарихка керү мөмкинлеге бар»
2012 елда Ләйлә суга сикерү буенча спорт мастеры була, ә 2014 елда Мария Казакова белән бергә каланчадан синхрон сикерү буенча Россия Кубогында бронза медаль яулый. Бер елдан соң ул Анастасия Козлова белән ил чемпионатында икенче урынны ала. 2017 елда Ләйлә, Россия җыелма командасы әгъзасы буларак, карьерасының тәмамлануы турында игълан итә, дөрес, 2018 елда Идел буе Кубогы өчен ярышларда үзенең яшь категориясендә тагын җиңү яулый.

Спорттан киткәннән соң Ләйлә фитнес-клубта йөзү буенча тренер булып эшли, рекламалар өчен фотога төшә, шулай ук Көньяк Кореяда Aqua Planet Jeju шоуында чыгыш ясый. 2020 елда Сәламова Россиягә әйләнеп кайта һәм Франциягә эшкә китәргә җыена, әмма барып чыкмый. Шул ук вакытта кыз хай-дайвингка – экстремаль биеклектән, 20-27 метр биеклектән сикерү юнәлешенә эләгә. 
«Кырымга әти — әниләр янына кайттым, балалар аниматоры булып эш таптым, - дип сөйләгзн Ләйлә «Матч ТВ» телеканалына. - Ул елны Ялтада халыкара ярышлар үткәрелде һәм мине анда Артем Сильченко чакырган иде. Без бер-беребезне белә идек. Бу көн бердәнбер ял көне. Иртәнге сәгать дүрттә тордым да Ялтага чыгып киттем. Үзем белән билетлар һәм ризык өчен акча алдым.
Егетләр миңа каланчаларга якынрак килү өчен аккредитация бирде. Ярышларны карадым һәм миңа бик ошады. Менә бүләкләү башланды, ә мин читтә басып карап торам һәм катнашмыйм. Бүләкләүне көттем һәм нәтиҗәдә автобуска соңга калдым (көлә). Кире юлга акча юк.
Суга сикерүче егетләр тынычландырды, фуршетка чакырды. Һәм анда Костя Попович: «Киләсе ярышларда син булырга тиеш!" диде. Миңа: «Әле син яшь һәм үземне күрсәтү өчен мөмкинлек бар»,  дип әйттеләр. Мин инде 18 яшемдә үземә юлны ябып куйган идем! Спортка кире кайтырга булдым, яңа юнәлештә үзеңне сынап карау кызык тоелды".

Хай-дайвингта Сәламованың карьерасы бик тиз үсә. 2021 елда Ләйлә бу дисциплинада Россия чемпионатында алтын медаль яулый һәм дөнья чемпионатына квалификациядә катнашкан беренче россияле була. Сайлап алуда ул 18нче урынны ала һәм дөнья чемпионатында чыгыш ясау хокукына ия була. Кызганычка каршы, турнир кичектерелә. Ә 2022 елда Сәламова клифф-дайвинг буенча дөнья сериясенә уайлд-кард алган беренче россияле була. Август аенда ул бу дисциплина буенча турнирда чыгыш ясый, 12 нче урынны яулый. 

«Коточкыч яңалык»
13 гыйнварда юл һәлакәтендә 23 яшьлек спортчының гомере фаҗигале рәвештә өзелүе турында билгеле булды. Бу хакта Россия Суга сикерү федерациясе президенты Станислав Дружинин хәбәр итте. "Безнең спортчы Ләйлә Сәламова автомобиль һәлакәтендә үлде. Бу безнең өчен шок. Аңа 23 яшь иде, аның әти-әнисе һәм туганнары нинди уйлар кичерүен күз алдына китерү дә кыен. Аларның барысының да кайгысын уртаклашам", дип язды ул социаль челтәрләрдә. 

Куркыныч юл-транспорт һәлакәте 12 гыйнварда Карелиянең Лахденпох районында килеп чыга. Сәламова утырган Мицубиси лансер йөртүчесе машина белән идарә итүне югалта.

Машина каршы полосага чыга һәм Volkswagen Tiguan белән кара-каршы бәрелешә. Бәрелештән соң Ләйлә утырган машина берничә кисәккә тарала. Спортчы һәм Мицубиси шоферы шунда ук үлә, икенче машинада утырган ир-ат һәм хатын-кызны авыр җәрәхәтләре белән хастаханәгә илтәләр. Операциядән соң ук зыян күргән Екатерина Зеленовская фаҗига турында үз версиясен сөйләгән.

"Без Петербургка бара идек. Сәгатенә якынча 110 километр белән хәрәкәт иттек, - дип сөйләгән Зеленовская РЕН ТВга. - Тау астыннан чыгып килә идек. Безгә каршы машинаның юлда әйләнүен күрдек, ул безнең полосада басып калды. Без хәтта бернәрсә дә эшләргә дә өлгермәдек. Кичә операция булды, эчемә зур зыян килгән, эчәгем ярылган. Мин йөклелекнең өченче аенда идем. Хәзер юк инде. Оча сөягем сынган".

Танылган спортчы Дмитрий Саутин да спортчының фаҗигале үлеменә бәйле кайгы кичерүен белдергән. 
"Ул Россия өчен уникаль кыз иде. Ул барыбыз өчен дә үрнәк булды, аның артыннан башкалар да тартылды. Аның искиткеч ихтыяр көче бар иде, ул аңа 20 метрдан суга сикерергә мөмкинлек бирде. Бер генә сикерү дә түгел, ә дөнья дәрәҗәсендәге дүрт сикерүдән торган программаны күз алдына китерәсезме! Ул хай-дайвингта дөньяның иң көчле суга сикерүчеләре белән көрәшә алды».
Россия Суга сикерү федерациясе кайгы уртаклашу телеграммасында Ләйләнең шигырен дә урнаштырган. Спортчы кыз аны декабрь аенда язган икән. 
«Я буду жить без капли сожаления.
Дружу со скукой, знаю, потом будет всё равно.
Влюбись, не своди с неё глаз,
В жизни каждого и чёрного, и белого полно.
Живи, живи, мой друг, сейчас,
Ведь потом будет всё равно».

Фото: спортчының шәхси архивыннан