Адел Вафин: «Заманча җиһазландырылган бала тудыру йортлары кирәк»

Казанның 7нче хастаханәсендә узган очрашуда әлеге мәсьәлә уңаеннан Татарстан сәламәтлек саклау министры Адел Вафин журналистларга үз аңлатмасын бирде. Сүз бала тудыру йортларын кыскарту турында бармый, барысы да модернизация, яңарту программасы кысаларында башкарыла. Төп максат – бала табу вакытында үлем очракларын киметү. Нигездә, атнасына бер-дүрт туу очрагы булган бала тудыру йортлары ябылган.

Туучылар саны артып торган заманда, бала тудыру йортларының кыскартылуы, беренче карашка, чынлап та сәеррәк тоела. Казанда гына да атна саен 450гә якын бала дөньяга аваз сала. Әмма бала тудыру процессының 40 процент очрагы гына яхшы уза. Бала һәм ана сәламәтлеген, гомерен саклап калу өчен квалификацияле медицина ярдәме, заманча җиһазлар кирәк. Аларның күбесе район хастаханәләрендә юк. Кызганыч, катлаулы хәлләр килеп чыкканда, белгечнең белеме, тырышлыгы гына җитми. Табибларның бер фикергә килеп, заманча җиһазлардан файдаланып, күмәкләшеп эшләве мөһим. Шуңа да, бу мәсьәләләрне хәл итү өчен, бала тудыручылар өчен махсус маршрут төзелгән. Татарстанның бала тудыру йортлары ябылган районнарында булачак әниләрне икенче дәрәҗәдәге муниципальара үзәкләргә юллаячаклар. Әлеге заманча бала тудыру үзәкләре Казанда, Чаллыда, Әлмәттә, Түбән Камада, Бөгелмәдә, Яшел Үзәндә урнашкан. Казанда ачылган яңа перинаталь үзәк тә 100 хатын-кызны кабул итәргә әзер. Әлеге үзәкләрнең төп максаты – йөклелекне саклап калу, сәламәт бала тудыруга юнәлдерелгән киң профильле эш алып бару.

Күптән түгел Казанда да Мәскәү районындагы 2нче бала тудыру йорты һәм Киров районындагы 4нче хастаханәдәге бала тудыру бүлекләре ябылган иде. Соңгысында бала тапкан укучыбыз Әдилә Яруллина:

– Бала тудыру йорты ябылырга бер атна кала бәбәйләдем. Монда шартлар бик начар иде. Юньләп ашатмыйлар. Бөтен җирдә пәрәвез, бәдрәфләр пычрак, аның каравы, персонал бик тәҗрибәле монда. Мондый белгечләр бары уңай шартларда гына эшләргә тиеш дип саныйм, хатын-кызларга да перинаталь үзәккә барып бала тудырсалар, күпкә ышанычлырак, – дип фикерләре белән уртаклашты. Кыскасы, бала тудыру йортларының берләшүен хәерлегә юрыйк. Иң мөһиме – балалар сәламәт булып тусын.

 Адел Вафин, Татарстанның Сәламәтлек саклау министры:
– Бала тудыру йортлары өлкәсендәге үзгәрешләр буш урында барлыкка килмәде. Модернизация вакытында Татарстанда сыналган тәҗрибәгә таяндык. Бүген елына 150дән дә кимрәк туу очрагы теркәлгән бала тудыру йортларын кыскарту турында сүз бара.Булачак ананы сәгать ярым эчендә махсус үзәкләргә исән-имин илтеп җиткерер өчен, бу район хастаханәләре махсус реанимобильләр белән тәэмин ителде. Табиб ярдәме тиз кирәк булган, гадәттән тыш очракларда белгечләр район хастаханәләрендә дә әзер торачак, хатын-кызлар консультацияләре эшләячәк. Биредә белгечләр йөклелек чорын күзәтеп барачак.