Җәмгыятькә файдалы булсаң, акча бирәләр

Акча бер вакытта да артык түгел инде ул. Ничек алырга икән соң ул грантны?
“Татар-информ” мәгълүмат агентлыгында узган матбугат конференциясендә шуның серен чиштеләр.
— Конкурска 2021 елда башкарылган социаль әһәмияткә ия эшләр тәкъдим ителә. Татарстанда берничә мең иҗтимагый оешма эшчәнлек алып бара. Мондый бәйгеләр гражданлык җәмгыятен үстерергә ярдәм итә, -диде Татарстан Республикасы Дәүләт Советы депутаты, законнарның татар һәм рус телләрендәге тәңгәллеге комиссиясе рәисе Римма Ратникова.

— Татарстанда милли-мәдәни автономияләр шактый, алар бәйгедә катнаша аламы?- дип, “Шәһри Казан” газетасы исеменнән шунда ук сорау бирдем.
— Әлбәттә, милли-мәдәни автономияләр дә катнаша ала. Конкурста әле “Татарстанда Туган телләр һәм халыклар дуслыгы елы” номинациясе дә булдырылды. Шушы шигарь астында үткәрелгән яки үткәреләчәк чараларны да тәкъдим итәргә мөмкин,-дип җавап бирде Римма Ратникова.-Кайбер муниципаль районнар бу конкурска битарафлык күрсәтә. Активлык зарур,  бу акча алу мөмкинлеге бит.

Татарстан Республикасы Иҗтимагый палатасы рәисе Зилә Вәлиева да активлык зарурлыгын искәртте.
— Иҗтимагый оешмалар эшчәнлеге буенча Россия күләмендә чыгарылган рейтингта Татарстан-бишенче. Россия Президенты грантларына да проектларны актив тапшырабыз, ләкин, тагын да өлгеррәк булу кирәк,- диде Зилә Вәлиева.

Казанның социаль тернәкләндерү һәм яраклашу үзәге (“Центр реабилитации и адаптации”) вәкиле Азат Гайнетдинов үзләренең эшчәнлекләре турында сөйләде.

— Без авыр хәлдә урамда калган кешеләргә яшәү урыны белән булышабыз. Көн саен 1 меңгә якын мохтаҗны бушлай тукландырабыз, Казанда хәзер бишенче туклану пункты ачырга әзерләнәбез. Кешеләргә документларын кабаттан торгызабыз. Дәүләт ярдәме алабыз, предприятиеләр һәм оешмалар, эшкуарлар һәм гади кешеләр дә булыша. Киемнәр китерәләр, без шуларны 100-200 сум символик бәягә сатабыз, кергән акча социаль ярдәм чараларына тиененә кадәр санап тотыла,-диде Азат Гайнетдинов.

Республиканың икътисад министры урынбасары Олег Пелевин таныштырганча, конкурска гражданлык җәмгыятен үстерү, халыкның тормыш дәрәҗәсен күтәрү юнәлешендәге эшчәнлек проектлары тапшырыла.

Иҗтимагый оешманың кимендә 1 ел эшчәнлек алып барганлыгы, быелның 1 сентябренә салым һәм түләү бурычлары булмавы шарт. Сәяси партияләр конкурста катнаштырылмый,-дип искәртте Олег Пелевин.

Татарстанның Икътисад министрлыгының сайтында грантытатарстана.рф бүлекчәсендә конкурс турында тулырак мәгълүмат урнаштырылган.