Сәламәт тормышына тизрәк әйләнеп кайтачагына өметләнә

Баулылы Илвир Карипов мобилизациянең беренче көннәреннән үк махсус хәрби операция зонасында булды. Якташыбыз җитди яраланганнан соң өенә кайтты. Ул, тыныч тормыштан алгы сызыкка эләгеп, аннан соң кире тыныч тормышка әйләнеп кайту тарихы белән бик теләп уртаклашты.

Илвирга хәрби комиссариаттан повестка Россия Президенты Владимир Путинның сентябрь чыгышыннан соң ук диярлек килгән. 2022 елның 29 сентябре иртәсендә егет мобилизациянең беренче дулкыны белән фронтка китәргә мәҗбүр булган.

– Ул вакытта әле без моның нәрсә икәнен аңламый идек. Курку гына түгел, билгесезлек бар иде. Сугыш сугыш бит инде ул, – дип искә ала ул көнне Илвир Карипов. – Повестка килгән көнне хәтерлим: мин өлкән балаларны түгәрәкләрдән алдым, хатыным эштән өйгә кайтырга тиеш иде. Ул вакытта ул йөклелекнең бишенче аенда иде инде, өченче балабызны көтә идек. Өйгә кайткач, повестка алганлыгымны әйттем. Әлбәттә, балалар кәефсезләнде, берсе елап ук җибәрде. Ләкин ахыр чиктә бу яңалыкны ныклык белән кабул итәргә мәҗбүр булдылар. Китәргә кирәк икән, димәк, китәргә. Мобилизациягә эләккәнче мин бораулау цехында нефтьче булып эшләдем, монтажлау эшләрен контрольдә тота идем. Мин шунда ук кадрлар бүлегенә, җитәкчегә шалтыраттым, хәлне аңлаттым. Барысы өчен дә көтелмәгән яңалык булды. Мин анда булган вакытта һәрвакыт җитәкчелекнең ярдәмен тоеп тордым.

Илвир 2011-2012 елларда Түбән Новгород өлкәсендә пулемётчы булып хезмәт иткән.

– Армия, хәрби тормышның нәрсә икәнен аңлый идем инде. Ләкин без махсус операциядә кулланган корал яңа төрле иде һәм мин хезмәт үткән вакыттагы кораллардан аерыла иде. Махсус хәрби операция барышында мин үз хезмәтемне шулай ук пулеметчы сыйфатында башладым. Взвод командиры вафат булганнан соң, мин аның урынына боерык белән билгеләндем. Яраланганчы, җиде ай дәвамында взвод командиры вазыйфаларын башкардым, – дип сөйли ул. – Безне Донецкига күчергәч яраландым. Бу безнең дүртенче хәрби задание иде. Ул чакта без барыбыз да үз постларыбызда идек, безгә арта (ред. артиллерия) белән һөҗүм булды. Утның бер өлеше кулымны, аягымны һәм уң як гәүдәмне яралады. Хәтерлим, ул көн гадәти түгел иде, бу якларга хас булмаган көчле буран чыккан иде. Шушы һава шартларыннан файдаланып, без һәлак булган иптәшебезне алып чыгуга ирештек. Аны озак вакыт таба алмадылар, ә аннары чыгара алмадылар, чөнки урын даими күзәтү астында торды, атыш барды. Буран сәбәпле, без аны тәүлекнең якты вакытында чыгара алдык.

Иң авыры – сугышчан иптәшләрне югалту. Илвир хәрби хәрәкәтләр вакытында очраган авырлыклар һәм махсус хәрби операциядән соң аякка басу процессы турында да уртаклашты.

– Кызганычка каршы, анда бик күп егетләр “калды”. Исән калганнар хәзер Россиянең төрле шәһәрләрендә тернәкләнү уза. Мин алар белән элемтәдә торам, вакыт-вакыт аралашам, аларның хәле, тернәкләнү процессы, планнары һәм уңышлары белән кызыксынам, – дип сөйли сугышчы. – Яраланганнан соң мин төгәл бер ел госпитальләрдә дәваландым, тернәкләнү уздым. Баштарак нәрсә һәм ничек булачагы турындагы билгесезлек тә авыр булды. Мин Казанда, Самарада дәваландым. Дәвалану һәм миңа карата күрсәтелгән ярдәм югары дәрәҗәдә булды дип саныйм.

Илвир Карипов “Батырлык өчен”, II дәрәҗә “Кыюлык өчен” медальләре, “Татарстан Республикасы алдындагы казанышлар өчен” ордены белән бүләкләнгән. Реабилитациядән соң ул үзенең элеккеге эш урынына кайткан. Гаиләдә барысы да аның янәшәдә булуына бик шат һәм бәхетле.

– Элек авыр проблема булып тоелган тормыш вак-төякләре махсус хәрби операциядә булып кайтканнан соң проблема түгел икәнен аңладым, боларның барысын да хәл итәргә мөмкин. Төзәтеп булмаган әйбер – хәрби дусларымның һәлак булуы. Аларны инде кире кайтарып булмый, – дип сөйли әңгәмәдәшем. – Мин өйгә кайткач, гаиләмдә кызларымның кәефе дә, тәртибе дә үзгәрде, дулкынлану, борчылу юк. Гомумән алганда, барысы да яхшы: тернәкләнү узам, тыныч гражданлык тормышына әкрен генә әйләнеп кайтам кебек. Хәзер анда булган егетләргә сабырлык, батырлык телим. Бу хәлләрнең барысы да тизрәк бетүен, илгә тынычлык килүен, ә госпитальләрдә булганнарның барысына да сәламәтлек телим. Ә гади гражданнарга, бүгенге көнгә кадәр фронтка, хәрбиләргә күрсәткән ярдәмнәре өчен, рәхмәт белдерәсем килә. Аларның булышуы хәтта вак-төякләрдә дә сизелә, бөтен ярдәм сугышчыларга барып җитә. Барысына да бик зур рәхмәт. Барыбызга да тыныч күк йөзе телим.

Тернәкләндерү дәвам итә. Аның ярдәмендә Илвир үзенең элекке кебек үк сәламәт тормышына тизрәк әйләнеп кайтачагына өметләнә.
 

Индира Сәйфуллина