«Бүген дә китап гонорарына машина алып була»

– Быелгы планда Адлер Тимергалинның «Миллият сүзлеге» китабының өченче томын чыгару ниятләнелә. Галимҗан Ибраһимовның әсәрләреннән торган унбиш томлык бастырырга уйлыйбыз, быел аның бишесе чыгачак, Рабит Батулланың ун томлыгын чыгарып бетерергә тырышабыз. Нурихан Фәттахның «Сызгыра торган уклар», Хисам Камаловның «Каһәр», Миргазиян Юнысның «Кыпчак кызы» басыла, Абдулла Алиш әкиятләре, Габдулла Тукайның «Су анасы» белән «Шүрәле»се аерым китаплар булып, икесе ике телдә чыкты. Тукайның әлеге китаплары – иң күп сатыла торган китаплар исемлегендә. Аның укучылар арасында киң таралуының бер сәбәбен арзан булуда күрәбез. Тиражын зур итеп, бәясен арзанайтып куйдык. Бәясе нибары – 70 сум. Китаплар нәкъ элеккечә – Байназар Әлминовның рәсемнәре белән чыкты. Эдуард Успенскийның да «Крокодил Гена һәм аның дуслары»н татарчага тәрҗемә итеп бастырдык. Киләчәктә татар халык әкиятләре китабын да чыгарырга уйлап торабыз. Якын киләчәктә балалар өчен кнопкалы-тавышлы китаплар да чыгарачакбыз, – дип сөйләде журналистларга Илдар Сәгъдәтшин.

Китап нәшриятына, нишләп аудиокитаплар да чыгармыйсыз, дип мөрәҗәгать итүчеләр дә бар икән. Нәшрият директоры аларны чыгара башлаячакларын, берничәсе быел ук сатуга чыгачагын сөйләде. Хәзерге вакытта студиядә китаплар яздыру эше бара, диде ул. Әзерләнү процессында булган аудиокитаплар арасында Дәрдмәнд, Мәҗит Гафури, Фатих Әмирхан әсәрләре, татар халык әкиятләре дә бар.

Журналистларны социаль әһәмияткә ия китапларның исемлеге ничек барлыкка килү процессы да кызыксындырды.

– Нәшриятка елына 500дән артык кулъязма керә. Аларны тикшереп, анализлап, рецензия язучыларга тапшырыла. Редсовет алар арасыннан тавыш бирү юлы белән сайлап ала. Редакция советына Тукай премиясе лауреатлары, шагыйрь-язу­чылар, нәшрият бүлекләре җитәкчеләре керә. Алар бер елга план төзи һәм ул Татарстан Министрлар Кабинеты карары белән раслана, – дип аңлатма бирде нәшрият директоры.

Нәшрият, китаплар бастырудан тыш, аларны сату эшен дә алып бара. Китапларны интернет аша сатуны да актив алып баралар. Китаплар ­дөнья күләмендә иң популяр булган интернет-кибетләрдә сатыла. ­Россия төбәкләре арасында интернет мәйданчыкларда китап сату эшен оештыру буенча Татарстан нәшрияты алда бара, дип билгеләп үтте Илдар Сәгъдәтшин. Китапны нәшрияттан күпләп сатып алучы 800 оешма бар икән, алардан тыш кибет челтәрләренә дә озатыла. Республиканың кайбер шәһәрләре һәм районнарында да нәшрият китапларын сату оештырылган. Агропромпарк­та да һәр шимбә-якшәмбедә китап­лар сатыла.

– Берничә атна элек Казан үзәгендәге «ГУМ» сәүдә үзәгендә дә Татарстан китап нәшрияты үзенең кибетен ачты. Ярты гына ай эшләсәк тә, табыш чыгымнарны каплый алды. 2018 ике кварталында 47 мең китап сатылды. Нәшриятның иң күп сатыла торган китаплары исә – «Су анасы», «Шүрәле», «Секреты татарской кухни», «Сөембикә» альбомы, Татар тарихы һәм Татарстан халыклары әкиятләре. Сатылган продуктның 70 проценты – балалар өчен чыгарылган китаплар, – диде ул.

Чит төбәктәге татарларга якы­наю өчен, нәшриятчылар төрле шәһәрләрдә узган күргәзмә-ярминкәләрдә дә катнаша. Шушы көннәрдә Мәскәүнең ВДНХ залында 25 илдән килгән 300 нәшрият катнашачак күргәзмәгә алар 1700 исемдәге китап алып барачак.

Сүз арасында китап нәшрияты директоры, бүген дә китап гонорарына машина алып була, дигән фикер җиткерде.

– Элек китаплар йөзәр мең тираж белән чыга һәм язучыдан да бай кеше юк иде. Гонорарга машина да алып була, диләр иде. Әгәр дә укучылар арасында укылачак китап язып, ул меңләгән тираж белән басыла һәм яхшы сатыла икән, аның гонорарына бүген дә машина алып була, – ди Илдар Сәгъдәтшин.

Фотолар: «Татар-информ»