Бишмәт яңа, ыштан тишек: кышка керербез ничек?!

Казанда быел 19 балалар бакчасы бинасы капиталь төзекләндерелә. Ләкин, төзекләндерүдән соң, әлеге учреждениеләрнең “файдалануга яраклы” дигән документ-бәяләмә ала алмыйча каңгырап йөрүләре ихтимал.

Татарстан Президенты Рөстәм Миңнеханов башлангычында республикада балалар бакчаларын капиталь ремонтлау программасы старт алды. Казанда 19 балалар бакчасын һәм өч мәктәпне төзекләндерүгә республика бюджетыннан 596,4 миллион сум билгеләнгән.

– Бакчаларда сабыйларга урын җитми әле. Биналарның нык искергән булуы да яңа төркемнәр тупларга мөмкинлек бирми. Казанда елына ике-өч бакча төзекләндерә ала идек, быел 19 бакча колачлана. Балалар бакчаларын капиталь төзекләндерү программасы башлаганнары өчен Президент Рөстәм Миңнеханов белән премьер-министр Алексей Песошинга зур рәхмәт! – диде мэр Илсур Метшин кичә “эшлекле дүшәмбе” киңәшмәсендә.

Тик мәсьәләнең чишелеше ярым-йорты хәлдәрәк кала икән. Тишелеп беткән кәчтүм-ыштан өстенә яңа бишмәт киеп куйган төслерәк булачак.
– Программада бинаны төзекләндерү генә каралган. Балалар бакчаларында хуҗалык корылмалары, җиһазлар, аш-су әзерләү җиһазлары, ишегалдындагы уен корылмалары да тузган. Аларны яңарту өчен өстәмә рәвештә 366 миллион сум акча кирәк. Бу төр эшләр башкарылмаса, күзәтчелек ограннары балалар бакчасы эшчәнлегенә рөхсәт бирмәскә дә мөмкин, – дип, борчылып, әйтеп үтте торак-коммуналь хуҗалык комитеты рәисе Дмитрий Анисимов.

Казан шәһәре башкарма комитеты өстәмә акча сорап, Татарстан Президентына мөрәҗәгать юллаган. Мәгариф идарәсе җитәкчесе Илнар Хидиятов әйткәнчә, Казанда өч яше тулган балалар бакча урыннары белән тәэмин ителгән. Өч яшькә якынлашып килә торган ике меңнән артык бала чиратка куелган. Балалар бакчаларын капиталь төзекләндерү бина мәйданнарын нәтиҗәлерәк файдалану, ягъни яңа төркемнәр ачу мөмкинлеге тудырачак.

– Кайбер гаиләләр балаларын үзләре яшәгән йорттан нык еракта булган бакчага йөртергә мәҗбүр, – ди Илнар Хидиятов.

Казанда ун елда күп фатирлы 2430 йорт капиталь ремонтланган, бу төзекләндерүгә мохтаҗ торакларның 45 проценты. Дмитрий Анисимов чыгышында әйтелгәнчә, быел башкалада күп фатирлы 286 йортка (1,91 миллиард сум), 18 сырхауханәгә (338,1 миллион сум), 8 үсмерләр клубына (40,3 миллион сум) комплекслы төзекләндерү үткәрелә. Баштагы елларда тулай тораклар читтә кала иде, соңгы елларда аларга да бәхет елмайды.

– Быел да 11 тулай торак капиталь ремонтлана, ел ахырына кадәр әле тагын 2 тулай торакка өлгерергә исәп, – диде Дмитрий Анисимов.

Башкалада алты елда 15 балалар бакчасы һәм утыз елдан өлкәнрәк булган 134 мәктәп бинасы капиталь төзекләндерелгән.

– Мәктәпләргә капиталь ремонт үткәргәндә ансатрак булды, чөнки анда каникуллар бар, төп эшләр каникул вакытында башкарылды. Балалар бакчалары белән хәл катлаулырак, аларны туктатып булмый. Эшләр өлешләп башкарыла. Аның иң мөһиме – республикада балалар бакчаларын капиталь төзекләндерү буенча программа башлануда. Татарстандагы кебек социаль программалар башка бер генә төбәктә дә юк, – дип йомгак ясады мэр Илсур Метшин.